[A:༥༣༦]གཉིད་སད། སང་ཕྱག་དམ་དཔེ་ཆ་ཕེབས་པས་དེ་ག་སོར་བཞག་འདུག་གོ །ཡང་ནུབ་ཅིག་ཨ་ལྷུན་པ་ཡིན་སྙམ་པ་ཞིག་གིས་སྤྲུལ་སྐུས་སྐྱེལ་དུ་བཏང་པ་ཡིན་ཟེར་རག་བུམ་མགུལ་ཆིངས་དར་དཀར་ནོག་པོ་ཞིག་གིས་བྱས། ཁ་རྒྱན་རྨ་བྱ་དང༌། ཤེལ་གྱིས་བྱས་པ་ཞིག་དང༌། པོ་ཏི་བྲུ་ལེ་དཀོན་རྩོས་གྲིལ་བ་སྤྲད་པ་རྨིས་པས་སང་བཀའ་འདུས་ཀྱི་ཕྱག་དཔེ་སླེབས་ནམ་ལ་བྲིས་པའི་སྒང་ལ། རྨི་ལམ་དུ་སྤྲུལ་སྐུ་བྱོན་ནས་རིགས་འཛིན་གདུང་སྒྲུབ་ཀྱི་དབང་གནང་བ་བྱུང་ངོ༌། །ཤིང་གླང་ཟླ་བ་བཞི་པའི་ཚེས་བཅུ་བདུན་ནས་བཀའ་བརྒྱད་སྒྲུབ་ཆེན་སྨན་སྒྲུབ་དང་བཅས་པ་མཛད་དུས་བཀའ་བརྒྱད་ཀྱི་དཀྱིལ་འཁོར་གསུམ་གྱི་ཐིག་འདེབས་ཤིང༌། ནམ་མཁའ་ལའང་དཀྱིལ་འཁོར་གྱི་ཐིག་རྫོགས་པ་ཞིག་སྐྱ་ཏ་ལེ་འདུག་པ་རྨིས། ཡང་ནུབ་ཅིག་ནུབ་ཕྱོགས་ཀྱི་ནམ་མཁའ་ལ་མངའ་རིས་པཎ་ཆེན་བཞུགས་ནས། སྟོང་པ་སྟོང་པ་སྟོང་གསལ་འཛིན་མེད་ཡིན་གསུངས་ནས་ལི་སེར་པོའི་ཟ་མ་ཏོག་ནོར་བུ་མིག་གསུམ་པའི་དབྱིབས་ཅན་ཞིག་བདག་ལ་གནང་བྱུང་བ་དང་གཉིད་སད་དོ། །ནུབ་གཅིག་བཀའ་བརྒྱད་ཀྱི་དཔལ་དགུ་ཐོག་ཚད་ཙམ་འོད་འབར་བའི་མདུན་ན་སྤྲུལ་སྐུ་བཞུགས་ནས་བཀའ་བརྒྱད་ཀྱི་རྒྱུད་ལུང་མན་ངག་ཐམས་ཅད་འདིར་འདུས་ཤིང་ཁྱོད་རང་བདག་པོ་ཡིན་པས་ཡེ་གསུང་པོ་ཏི་གཅིག་ང་ལ་གནང་བྱུང་ངོ༌། །སྟག་ལོ་ཆོས་ལུང་སྒང་གི་ཁང་ཆུང་དེར་མཚམས་དམ་པོའི་ཁོང་ནས་དཔོན་ས་ནམ་མཁའི་དྲུང་སོགས་ཁ་ཅིག་ལ་རོ་སྙོམས་སྒང་འདྲིལ་བུག་ཆོས་བྱས་བཤད་པའི་གྲོལ་ཁ་ཚེས་བཞིའི་སྔ་དྲོ་རྨི་ལམ་དུ། གཅུང་རིན་པོ་ཆེ་སྐུ་གཟི་འོད་ཤིན་ཏུ་འབར་ཞིང༌། ན་བཟའ་ཀོང་གཟན་དུར་ཁ་ཞིག་བཞེས། འཁོར་མང་ཆེན་དང་བཅས་