[A:༥༤༧]དང་རིག་པ་འཛིན་པ་ཀུན་གྱིས་མདུན་ནས་བདར། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་སྡུན་ནས་བསུས། འཇིག་རྟེན་སྐྱོང་བ་རྣམས་ཀྱིས་ཞབས་ནས་བཏེག །ལྷ་དང་ལྷ་མོའི་ཚོགས་དཔག་ཏུ་མེད་པས་མེ་ཏོག་གི་ཆར་འབེབས་ཤིང་འཇའ་དང་འོད་ཀྱི་ལམ་ནས་དག་པའི་ཞིང་དུ་གཤེགས་པར་གྱུར་ཏོ། །ཀྱེ་མ་ཡབ་རྗེ་རྡོ་རྗེ་འཆང་དབང་དེ། །རྟག་པར་ཞེན་ཚེ་ཆོས་དབྱིངས་ངང་དུ་གཟིམས། །ཆད་པར་རློམ་ཚེ་སྒྱུ་མའི་གཟུགས་སྐུར་བཞེངས། །ཀྱེ་མ་ཀྱི་ཧུད་ཐུགས་རྗེའི་བདུད་རྩིས་སྐྱོངས། །ཁྱོད་སྐུ་ཉིན་བྱེད་ཆོས་དབྱིངས་ནུབ་རིའི་རྩེར། །གཟིམས་ཚེ་འགྲོ་རྣམས་ལག་གི་ཀུ་མུ་ད། །འགྲམ་པའི་ཆུ་མཚོར་བརྟེན་པ་ངལ་བའི་ལུས། །ཞིང་འདིར་ཁྱོད་སྐུའི་ངང་ཚུལ་བརྡས་བསྟན་ནས། །ད་ནི་སྲིད་ཞིའི་ཆོ་འཕྲུལ་སྒྱུ་མའི་གར། །གཉུག་མའི་ངང་ནས་རོ་སྙོམས་གཡོ་མེད་བདེ། །ཁྱོད་སྐུ་དག་པའི་རང་ཞལ་དབྱིངས་སུ་མཇལ། །ཨ་ཧོ་སྙིང་ལ་བདུད་རྩིའི་ངལ་གསོ་བྱིན། །ཅེས་བརྗོད་ནས། དམ་པ་འདི་ཉིད་ཀྱི་གསང་བའི་རྟོགས་པ་བརྗོད་པའི་གཏམ། སོ་སོ་སྐྱེ་བོ་དག་གི་སྤྱོད་ཡུལ་མ་ཡིན་པ་གོང་དུ་བརྗོད་པ་དག་གིས་ཚད་མས་གྲུབ་པ་ཡིན་མོད། འོན་ཀྱང་འདི་ཙམ་གྱི་གསང་ཚིག་ཀྱང་ཀུན་གྱི་བློར་མི་ཤོང་བའི་སྣོད་ལྡན་རེ་རེ་རྣམས་ཀྱི་སྤྱོད་ཡུལ་དུ་བྱ་ཞིང༌། འདིས་མཚོན་པའི་གསང་བ་བསམ་གྱིས་མི་ཁྱབ་པ་ཞིག་ཡོད་མོད། འདིར་བརྗོད་པར་ག་ལ་ནུས་སོ། །དམ་པ་ཁྱོད་ཀྱི་ངོ་མཚར་གསང་བའི་གཏམ། །བགྲང་ཡས་རྒྱལ་བས་བསྐལ་པར་མི་གསུང་ན། །དེང་འདིར་