[A:༥༥༤]ཁ་གསུམ་ལ་དཔལ་ལྡན་ས་སྐྱ་པས་མངའ་སྒྱུར་བའི་ཚེ་ཤངས་ཁྲི་སྐོར་གྱི་ནང་ཚན་དང་གནམ་གྱིས་བསྐོས་པའི་དཔལ་ཕག་མོ་གྲུ་པའི་དུས་རྫོང་ཆེན་བཅུ་གསུམ་དུ་གྲགས་པ་ཕོ་བྲང་ཆེན་པོ་རིན་ཆེན་སྤུངས་པའི་ཆབ་འབངས་སུ་གཏོགས་པ་གནུབས་ཁུ་ལུང་ཞེས་སྔོན་དཔལ་བསམ་ཡས་མཆིམས་ཕུར་སློབ་དཔོན་ཆེན་པོ་པདྨ་སམ་བྷ་ཝས་སྒྲུབ་པ་བཀའ་བརྒྱད་ཀྱི་དབང་བསྐུར་བའི་དུས་རྗེ་འབངས་དགུར་གྲགས་པའི་སྐུ་འཇམ་དཔལ་གཤིན་རྗེའི་དཀྱིལ་འཁོར་དུ་མེ་ཏོག་ཕོག་པ་གནུབས་སངས་རྒྱས་ཡེ་ཤེས་རིན་པོ་ཆེ་སོགས་སྐྱེས་ཆེན་དུ་མ་འཁྲུངས་ཤིང་ཁྱད་པར་ཁུ་ལུང་པ་ཡོན་ཏན་རྒྱ་མཚོས་མཚོན་གནུབས་ཀྱི་སྔགས་འཆང་རིམ་པར་བྱོན་པའི་བསྟི་གནས་རྗེ་མི་ལས་ལྷ་རྗེ་གནུབས་ཆུང་པར་དྲག་སྔགས་གཟའ་གདོང་དམར་ནག་ཞུས་ནས་ཧཱུཾ་ཤི་ཕཊ་སྒྱེལ་གྱི་མཐུས་སྐུ་དགྲའི་ཚོགས་ཆོམ་ལ་ཕབ་ཅིང་བྱང་ཁར་པཎ་ཆེན་རིན་པོ་ཆེ་ཤཱཀྱ་ཤྲཱིའི་བརྒྱུད་འཛིན་བསྟན་པའི་རྩ་བ་སོ་སོར་ཐར་པའི་འབྱུང་ཁུངས་ཆོས་ལུང་ཚོགས་པར་གྲགས་པའི་སྡེ་ཚུགས་པ། ལྷོ་བྱང་གི་ཡུལ་གྲུ་རྣམས་ཀྱང༌། རྟོགས་བརྗོད་རིན་པོ་ཆེ་ལས། གསེར་གྱི་བ་གམ་གཞལ་ཡས་ཁང༌། །ཁང་པས་བསྐོར་བའི་གྲོང་ཁྱེར་ནི། །འོད་ལྡན་ཞེས་བྱ་བསོད་ནམས་ནས། །འོད་ལྡན་མཐོ་རིས་ལྟ་བུ་ཡོད། །ཅེས་མརྒད་གོས་སུ་ཀླུབས་པའི་སྤང་ལྗོངས་མེ་ཏོག་རྣམ་པར་བཀྲ་བ་སྣ་ཚོགས་པའི་འབྲུ་རིགས་ཀྱི་སྙེ་མས་ཡོངས་སུ་དུད་པའི་ཞིང་གི་ཕྱོགས་མཚམས་སུ་ལྗོན་ཤིང་གི་འཕྲེང་བས་ཀུན་ནས་དཀྲིས་པ། གྲོང་དང་གྲོང་བརྡལ་གྱིས་ཁྱབ་པ་འཆི་མེད་ཀྱི་