[A:༥༥༣]བ་བསོད་ནམས་རྒྱ་མཚོས། ལར་དུས་གསུམ་རྒྱལ་བའི་ཐུགས་རྗེ་དང༌། །རྒྱལ་སྲས་པད་དཀར་ཞབས་དྲིན་ལས། །བོད་ཀྱི་ཡུལ་ཁམས་འདི་ཉིད་ཀྱང༌། །འཕགས་ཡུལ་དང་སྐལ་བ་མཉམ་པ་སྙམ། །ཞེས་སྲས་བཅས་རྒྱལ་བ་སྤྱི་དང་ལྷ་གཅིག་ཕྱག་ན་པདྨས་བྱིན་གྱིས་བརླབས་པས་དགེ་བ་བཅུའི་ཁྲིམས་དང༌། བཤད་སྒྲུབ་ཀྱི་བསྟན་པ་རྒྱ་གར་འཕགས་པའི་ཡུལ་ལས་མི་ཞན་པར་གསུངས་ཤིང་པཎྜི་ཏ་ཆེན་པོ་ག་ཡ་དྷ་རའི་ཞབས་ཀྱིས། ད་དགེ་སྦྱོར་བྱེད་པ་ལ་རྒྱ་གར་ལས་བོད་འདི་ཆུ་བཟང་ཞིང་བསིལ་དྲོད་སྙོམས། སྲོག་ཆགས་ཉུང་ལ་ཟས་བཅུད་ཆེ་བས་རྒྱ་གར་དུ་མི་འགྲོ་ང་བོད་དུ་སྡོད། ཅེས་འཁོར་འདས་དབྱེར་མེད་དག་པའི་སྣང་བས་འབྱམས་སུ་ཀླས་པའི་གྲུབ་པའི་འཁོར་ལོས་སྒྱུར་བ་དེས་ཀྱང་ཆེས་ཆེར་བསྔགས་པའི་བོད་ཡུལ་གྱི་སྟོད་པུ་རོང༌། མར་ཡུལ། ཟངས་དཀར་ཏེ་གསུམ་པོ་སྐོར་གཅིག །ལི། གྲུ་ཤ །སྦལ་སྡེ་སྟེ་གསུམ་པོ་སྐོར་གཅིག །ཞང་ཞུང༌། ཁྲི་ཏེ་སྟོད་སྨད་དེ་གསུམ་པོ་སྐོར་གཅིག་རྣམས་མངའ་རིས་སྐོར་གསུམ། མདོ་ཁམས་ལ་སྨད་ཁམས་བཏགས་པ་ཁམས་གཅིག །མདོ་སྨད་ལ་གཡར་མོ་ཐང་བཏགས་པ་ཁམས་གཅིག །བཙོང་ཁ་ལ་གྱི་ཐང་བཏགས་པ་ཁམས་གཅིག་རྣམས་སྨད་ཁམས་སྒང་གསུམ་སྒང་དྲུག་ཟེར་བ་ནི་བར་ཁམས་རང་ལ་ནང་གསེས་ཀྱི་དབྱེ་བར་མངོན། བར་ན་དབུས་རུ་དང་གཡོ་རུ་གཉིས། གཡས་རུ་དང་རུ་ལག་གཉིས་ཏེ་དབུས་གཙང་རུ་བཞིར་གྲགས་པའི་གཡས་རུའི་ཆ་ཤར་གོང་མའི་ལུང་གིས་བོད་ཆོལ་