[A:༥༥༦]ལྡན་དཔྱིད་ནི་མཐོང་བར་འགྱུར། །ཞེས་སྤྱིར་འདུལ་མངོན་དུས་འཁོར་ནག་རྩིས་རྒྱལ་པོ་ལོ་གསར་སོགས་ལོ་འགོ་འཛིན་ལུགས་མང་ནའང་རྒྱ་རྩིས་རྙིང་མ་ལ་བཅུ་གཅིག་པ་དཔྱིད་ཟླ་ར་བ་སྟག་ཏུ་ངོས་འཛིན་པས་ཀུན་ཡིད་དགའ་སྟོན་སྟེར་བ་ལེགས་ལྡན་དཔྱིད་ཀྱི་དུས་ལ་བབས་པ་མཱརྒ་ཤཱི་ར་ཞེས་པ་ཧོར་ཟླ་བཅུ་གཅིག་པའི་དམར་ཆའི་གང་བ་གསུམ་པ་མཁའ་འགྲོ་འདུ་བ་ཉེར་དགུ་རེས་གཟའ་ཟླ་བ། སྐར་མ་སོགས་པ། ཉི་ཤར་བུམ་པའི་དུས་སྦྱོར་གྱི་ཚེ་ཡུམ་ལ་བསྙུན་མི་མངའ་བའི་ངང་ནས་ལྟེ་བའི་ག་ཤ་གསུམ་རིམ་དུ་དཀྲིས་ཏེ་ཨ་ཞེས་པའི་རང་སྒྲ་དང་བཅས་སྐུ་འཁྲུངས། དེའང་ཀུན་མཁྱེན་བུའི་གསུང་སྐྱོར་ལུང་པས་དྲངས་པར། དོན་དམ་གཤིས་ཀྱི་གནས་ལུགས་ལ། །རྩིས་དང་འབྲས་བུའི་སྤྲོས་པ་བྲལ། །ཐ་སྙད་ལས་འབྲས་མི་སླུ་བས། །དགེ་བའི་འབྲས་བུ་བདེ་བ་དང༌། །སྡིག་པས་སྡུག་བསྔལ་སྦྱིན་པར་བྱེད། །གཟའ་སྐར་བདེ་སྡུག་བྱེད་པོ་མིན། །བྱེད་ཅན་བཅུ་གསུམ་མུ་སྟེགས་སྨྲ། །དེ་ནི་ལོག་པའི་ཀུན་རྫོབ་ཡིན། །ཐ་སྙད་སླུ་མེད་བདེན་པ་རུ། །རྩིས་ཚུལ་ངེས་པར་འཛིན་དགོས་ཏེ། །དཔེར་ན་ཐ་སྙད་དབང་བསྐུར་དང༌། །ཆོ་ག་ལྷ་གྲུབ་བྱས་པ་ཡིས། །དོན་དེ་འགྲུབ་པར་སངས་རྒྱས་དང༌། །པཎ་གྲུབ་རྣམས་ཀྱིས་གསུངས་པ་བཞིན། །རྩིས་ཚུལ་རྒྱུད་སྡེ་མདོ་མང་པོར། །རྩིས་ཚུལ་བྱེད་པར་གཅེས་པར་གདམས། །ཞེས་ཟླ་བ་བསོད་ནམས་ཀྱི་གཟའ་བཙན་ཕྱུག་དང་ལྡན་ཞིང༌། སོག་པ་ཆོས་ལྡན་ཐོས་ཤིང་ལས་ཀུན་མཁས་པ་སོགས་རྟེན་འབྲེལ་གྱི་སྒོ་འཕར་འགྲིག་པ་ནི། མདོ་