[A:༥༧༠]རྒྱུད་ཞི་བྱེད་འཕགས་བོད་སྡོམ་པའི་ཆབ། །རྩིང་སྤྱོད་དུག་བྲལ་ཉོན་མོངས་ནད་བརྒྱའི་སྨན། །རྒྱལ་ཀུན་དགྱེས་པའི་མཆོད་སྤྲིན་ཐུན་འཚམས་གོས། །འཆང་བའི་ཚུལ་ལ་མི་སྨོན་ཤེས་ལྡན་སུ། །ཐུབ་པས་ལུང་བསྟན་རྗེ་བཙུན་ཨེ་ཝཾ་པའི། །ལུགས་འཛིན་དཀྱིལ་འཁོར་སྤྲོ་བསྡུའི་བྱེད་པོ་འགས། །ངེས་གསང་ཆོས་སྒོ་བརྒྱ་ཕྲག་ཕྱེ་བའི་ཚེ། །ཨཽཌྜི་ཡ་ན་ས་འདིར་འཕོས་པ་བཞིན། །རིམ་གཉིས་ཆང་གིས་མྱོས་པའི་བདེ་སྟོང་ཟུང༌། །འཇུག་པའི་མཛའ་མོར་རྩེ་དགས་རྟག་རོལ་ཡང༌། །ལུས་ངག་སྡོམ་ལ་ཕྱི་ནང་མེད་བརྩོན་པའི། །རྣམ་འདྲེན་བསྟན་པའི་རྩ་བར་ད་གདོད་འཁུམས། །ཞ་ལུར་ཕེབས། ཆུ་ཕག་གི་དགུན་སྟོད་བར་ཞམ་འབྲིང་དུ་བསྙེན་ཏེ་མཁན་ཆེན་སྒྲུབ་ཁང་པ་བྱོན་པའི་དཔོན་སློབ་གཉིས་ཀར་ཐོས་བསམ་མང་དུ་མཛད། རྡོ་རྗེ་འཆང་དགུང་ལོ་རེ་ལྔར་ཕེབས་ཤིང་དབུས་གཙང་གི་བར་ས་ཁད་འགྱངས་པར་མ་ཟད་འདར་གྱི་མཁན་པོ་གནང་གཤིས་སྐུ་ན་དང་བཅས་འགྲུལ་བསྐྱོད་གནང་སྟབས་མ་བདེ་བའི་མཁན་ཆེན་གཞོན་ནུ་བློ་གྲོས་ཀྱི་གདུང་ཞུགས་འབུལ་དང་རྟེན་བཞེངས་སོགས་བསླབ་སྟོན་རྒྱས་པར་སྩལ་ནས་དབུས་སུ་བྱོན། ཧོར་ཟླ་བཅུ་གཉིས་པའི་ནང་དུ་རྗེ་བཙུན་གཞོན་ནུ་བློ་གྲོས་ཀྱི་སྐུ་པུར་དགྱེས་མཛད་རྡོ་རྗེའི་དཀྱིལ་འཁོར་ལ་བརྟེན་ནས་ཞུགས་སུ་ཕུལ་བའི་ཚེ་སྔར་ངེད་ཀྱི་པུར་སུ་ལའང་མ་སྟོན་གསུང་བའི་ཞལ་ཆེམས་ཡོད་པ་ལ་དཔགས་གྲྭ་དམངས་ཚོས་གོ་མེད་ཀྱིས་མཛད་དཀའ་ཞུས་དོགས་ཚོགས་པ་རྣམས་གདུགས་རོལ་ཆ་སོགས་མཆོད་རྫས་ཀྱི་ཕྱག་མཚན་དང་བཅས་