[A:༥༧༡]གསུང་ཆོག་མ་ཚར་བར་གཙུག་ལག་ཁང་ལ་སེར་སྦྲེང་གི་སྐོར་བ་དང་པུར་ཁང་གི་སྟེང་ཐོག་ཏུ་གདུགས་དང་གཡས་གཡོན་དུ་བཀྲ་ཤིས་ཁྲ་རིང་བཏང་ཞིང་སྦྱངས་ཟིན་ནས་ཞག་ཤས་བར་རྒྱས་བཏབ་པ་ཞལ་ཕྱེ་ནས། གདུང་རྟེན་བཞེངས་པར་བལ་པོ་མཁས་པ་མི་གྲངས་བཅུ་གཅིག་འབོད་པ་གནང་བའི་གསེར་ཟངས་ཀྱི་རྣམ་རྒྱལ་མཆོད་རྟེན་ཟླ་གཉིས་ཁོངས་སུ་གྲུབ་པར་དྲི་མེད་ཀྱི་སྲོག་ཤིང་འཛུགས་པའི་ཆོ་ག །རིང་བསྲེལ་རྣམ་པ་བཞིའི་གཟུངས་འབུལ་དངོས་གཙང་བརྟེན་བཞེངས་སོའི་སྙན་གྲགས་ལྷུར་བླངས་པ་མ་ཡིན་པའི་ཁུངས་བཙུན་ཡིད་ཆེས་སུ་གྱུར་པར་བཅོམ་ལྡན་འདས་དཔལ་ཀྱེ་རྡོ་རྗེ་མན་ངག་ལུགས་ཀྱི་སྒྲུབ་མཆོད་དང་འབྲེལ་བའི་རབ་གནས་ཀྱི་ཆོ་ག་ཉིན་གཉིས་མའི་སྒོ་ནས་དམ་ཚིག་པ་ལ་ཡེ་ཤེས་ཀྱི་ཚོགས་དངོས་སུ་བཅུག་པས་ལྷ་རྣམས་ཀྱིས་མཆོད་པའི་སླད་དུ་འཇའ་ཚོན་སྣ་ལྔའི་གུར་དང་མེ་ཏོག་གི་ཆར། རྒྱ་སྤོས་བཟང་པོའི་ངད་ཀྱིས་སྒྲུན་དུ་མེད་པའི་དྲི་བཟང་པོས་ཕྱོགས་ཀུན་ཏུ་ཁྱབ་པ་ངོ་མཚར་བའི་ལྟས་ཡ་མཚན་པ་བྱུང་བ་ནི། རྗེ་བཙུན་བླ་མ་རིམ་པར་བྱོན་པ་མཐའ་དག་ལ་དད་པ་སྔར་མ་སྐྱེས་པ་རྣམས་གསར་དུ་སྐྱེ་ཞིང༌། སྐྱེས་པའི་ཚོགས་གོང་འཕེལ་དུ་འགྱུར་བའི་ཐབས་ཁྱད་པར་ཅན་ཏེ། མཁས་མཆོག་དཔའ་བོས། གྲགས་པའི་མཚན་མར་གྱུར་པ་བཟང་པོ་འདི་རྣམས་ཀྱིས། །བདེ་བར་གཤེགས་གྱུར་ལམ་རྣམས་གང་ཡིན་བསྟན་པར་འགྱུར། །ཡིད་ལ་དད་པ་མེད་པ་རྣམས་ཀྱང་དད་པར་བྱེད། །ཆོས་དང་ལྡན་པའི་གཏམ་གྱིས་རབ་ཏུ་དགའ་བར་འགྱུར། །ཞེས་པའི་དོན་དུ་མངོན་ཞིང༌། སྡེ་པ་བཀྲ་ཤིས་རྩེ་བས་གསུང་ངག་བརྒྱུད་པའི་ཞལ་ཐང་