[A:༥༨༠]པ་དུས་འགྱུར་གྱི་དབང་གི་ཞ་ལུར་གདན་དྲངས། དེ་ནས་རིམ་གྱིས་ཆོས་འཁོར་ཡང་རྩེར་ཕེབས་པའི་ཁ་སྐོངས་མཁན་ཆེན་བསླབ་གསུམ་རྒྱལ་མཚན། མཐུ་སྟོབས་ཀྱི་དབང་ཕྱུག་བསོད་ནམས་ཆོས་འཕེལ། རྗེ་རྡོ་རྗེ་འཆང་དབང་ཕྱུག་རབ་བརྟན་གསུམ་བཞེངས་ཏེ་གྲང་མོ་ཆེར་ལམ་འབྲས་ལྷ་ཁང་གི་ཞལ་བཀོད་སོགས་བྲིས་འབུར་གྱི་སྐུ་བརྙན་རྣམས་ལ་རྡོ་རྗེ་འཆང་གིས་རབ་ཏུ་གནས་པར་མཛད་དེ་ངོ་མཚར་བའི་ལྟས་དུ་མ་བྱུང་ཞིང་ལྷ་མཆོད་མི་མཆོད་ཀྱི་དགའ་སྟོན་རྒྱ་ཆེར་གནང༌། རྗེ་བླ་མའང་དགྱེས་པའི་རྩེར་སོན་ནོ། །དབུས་འགྱུར་མཁས་བཙུན་རྩེར་སོན་ཆོས་སྐྱོང་ཞབས། །བདག་མེད་རྡོ་རྗེ་བཙུན་མོས་རྗེས་བཟུང་མཐུས། །ཚེ་གཅིག་ཟུང་འཇུག་སྐུ་བཞི་མངོན་གྱུར་པས། །གྲུབ་པའི་འཁོར་ལོས་སྒྱུར་བ་བི་རཱུ་པ། །གང་གི་ཐུགས་བཅུད་གསང་ཆེན་དབྱར་སྐྱེས་སྒྲ། །ཐོས་པས་འཕགས་བོད་སྐལ་བཟང་རྨ་བྱ་ཀུན། །བཅུ་གསུམ་རྡོ་རྗེའི་ས་ལ་གྲུབ་པའི་མཐའ། །རབ་སྙོག་མངལ་ཁུར་འཛིན་ལ་གཅིག་ཏུ་བྲེལ། །ཕྱོགས་རེ་ཙམ་མིན་ཐུབ་བསྟན་ཡོངས་རྫོགས་ཆོས། །ཚོགས་སློབ་བཤད་སྲོལ་བཞེད་པ་ཆེས་མང་བའི། །སྙིང་པོའི་ཡང་ཤུན་སྙན་བརྒྱུད་བདུད་རྩིའི་བཅུད། །སྣོད་ལྡན་ལེགས་བྲིས་ལས་གཞན་སྐལ་བ་ཕྲ། །རིན་ཆེན་སྒང་དང་རྒྱལ་ཚ་ལུང་མང་པོའི། །གདུང་རིགས་རིམ་བྱོན་ཞལ་བརྒྱུད་གསེར་གྱི་ཆོས། །མགོན་ཟུང་མན་ངག་མཁའ་འགྲོའི་ཁ་རླངས་ཅན། །འཛིན་ཁྱོད་ཟླ་མེད་ནམ་མཁའི་ཟླ་བ་འདྲ། །རྒྱུད་སྡེའི་ཐིག་ལེ་ཀུན་བསྡུས་ལུང་རྟོགས་བཞིན། །མཐོང་མོད་