[A:༥༩༡]རྗེ་རྡོ་རྗེ་འཆང་གཞན་སྣང་དུ་སྐུ་ན་ཆེར་སྨིན་ཅིང་སྤྱན་མི་གསལ་བ་སོགས་ནས་དཔལ་དཱི་པཾ་ཀཱ་ར་ཤྲཱི་ཛྙཱ་ན་དང་འབྲོམ་སྟོན་ཆོས་ཀྱི་རྒྱལ་པོ་དཔོན་སློབ་ཀྱི་རྣམ་ཐར་བཞིན་ཡར་ཀླུངས་བཀྲ་ཤིས་ཆོས་སྡེར་ཕེབས་དགོས་སོགས་ཐུགས་བྲེལ་གཞན་རྣམས་ཁྱད་དུ་བསད་དེ། བླ་མའི་སྲི་ཞུའི་ཞམ་འབྲིང་ལ་གལ་ཆེ་བར་དགོངས་ནས་བཅར་བཞུགས་གནང་བའི་ལོ་སྔོན་མ་རྣམས་སུ་རྡོ་རྗེ་འཆང་གཞན་དོན་དུ་གཤེགས་གྲབས་ཁ་ཡར་བྱུང་བར་རྗེ་འདི་ཉིད་ཀྱིས་གསོལ་འདེབས་བརྟན་བཞུགས་གནང་བས་ཞལ་ངོ་མ་བཟློག་པར་བཞུགས་ཤིང་ཁྱད་པར་ཕ་དམ་པ་ལུགས་ཀྱི་འཆི་མེད་མགོན་པོའི་སྒོ་ནས་བརྟན་བཞུགས་འབུལ་བ་གནང་བས་ཚེ་གཏོར་དགུ་འདྲེན་སྒང་ལ་བདུད་རྩིར་ཞུ་བ་སོགས་རྟགས་མཚན་ལེགས་པར་བྱུང༌། ཆོས་སྡེའི་གྲྭ་པ་འཕྱོས་པ་འཕྲིན་ལས་རྒྱ་མཚོ་ཟེར་བ་ཞིག་ལ་སེམས་སྐྱོན་མ་ཆགས་རུང་རྗེ་བཀའ་འགྱུར་བ་དབུས་ལ་ཕེབས་པར་ཡིད་གདུངས་ནས་རྡོ་རྗེ་འཆང་ལ་ད་ཆ་རྡོའི་ངོས་རང་ཡིན་འདུག་ཡང་ན་ནི་སྐུ་ཁམས་གཞི་མེད་དུ་གདངས་ན་ལེགས་ཤིང༌། དེ་མིན་ཞིང་གཞན་གཤེགས་ན་ཞེས་གླེང་མོ་བཏང་བ་བྱམས་པས་སྙན་དུ་གསོལ་བ་ན་ཁོ་བདེན་དབོན་དྲུང་གིས་ནན་ཆགས་གསུངས་པ་མ་བཟློག་པར་བསྡད་པ་མ་གཏོགས་སྡོད་འདོད་ཀྱང་མེད་ཅིང་གཞན་དོན་མི་ནུས་པའི་ལུས་འདི་དེ་ག་རང་དུ་འདུག་གསུང་ཆུ་བྱ་ཚེས་བཅུ་ཞིག་ལ་རྗེ་བླ་མ་ཕྱི་རོལ་ཏུ་མངོན་པའི་སྙུན་སོགས་ཡེ་མེད་པའི་ངང་ནས་དྲུང་ཆེན་བྱམས་པ་བསྟན་འཛིན་པར་ཁོ་བོ་འགྲོ་བ་ཡིན་ཚུལ་གསུངས་པ་བྱམས་པས་རྗེ་ཉིད་ལ་ཞུས་པར་བརྟེན་དྲུང་དུ་ཕེབས་ཤིང་ནན་ཏར་གསོལ་འདེབས་གནང་བས་ཞལ་གྱིས་བཞེས་ཏེ་སྐུ་ཚེ་བྱིན་གྱིས་