[A:༥༩༢]བརླབས་ནས་ལོ་གསུམ་བཞུགས་པའི་བར་མཚམས་སུ་སྐུ་ཅུང་ཟད་དྭངས་སྐབས་ཚེ་དབང་རྗེས་གནང་འཁྲིད་ཀྱི་རིགས་འགའ་གསན་ཅིང༌། རྭ་པོད། དཔལ་འཛིན་པོད་ཆུང་གིས་མཚོན་པའི་ལུང་དུ་མ་སྤྱན་ཚབ་བཅུག་ནས་གནང༌། སྙན་བརྒྱུད་ཞལ་བཞེས་གལ་ཆེ་བའི་རིགས་སོགས་ཆོས་ཀྱི་འཁོར་ལོ་བསྐོར་བཞིན་པར་བཞུགས། འཇམ་དབྱངས་རྡོ་རྗེས་དགེ་སློང་རབ་འཛིན་བསད་པའི་རྐྱེན་གྱིས་རྗེ་བཙུན་བཀའ་འགྱུར་བ་ཤིང་ཕག་ཧོར་ཟླ་བཅུ་གཅིག་པའི་ནང་དུ་དགོན་པའི་དོན་སྐོར་ལ་གཞིས་ཀ་རྩེར་ཕེབས་དེ་དུས་ཡར་འབྲོག་ཏུ་སོག་པོ་ཨས་ལང་གི་དམག་རྒྱུགས་པས་དབུས་གཙང་ཐམས་ཅད་ཟི་ཆོང་དེ་བའི་སྐབས་དང་འགྲིག་པའི་གཙང་སྡེ་སྲིད་ནས་སོག་བཟློག་ལ་དམིགས་པའི་སྐུ་རིམ་གནང་དགོས་ཚུལ་ཕེབས་པ་ལྟར་མགོན་པོ་ཁྲོ་བཅུའི་གཏོར་བཟློག་མཛད། རྫོང་གི་གཏོར་རྒྱག་པ་ཕལ་ཆེར་འཆམས་སོགས་སྤྲོས་བཅས་ལྷུར་ལེན་ཅིང་གཟིགས་མོའི་ཁྱད་ཀྱིས་ཆོ་ག་རྫོགས་མ་རྫོགས་ལ་མི་ལྟོས་པར་གཅིག་རྗེས་སུ་གཅིག་འདོན་པ་ཞིག་ཡོང་འདུག་པ་དྲུང་ཡིག་བདེ་རྒྱས་པ་འོངས་ནས་འདོན་དགོས་ཚུལ་དང་འཆམས་སོགས་ཇི་ཙམ་ཡོད་ཀྱི་དྲི་བ་བྱུང་བར་རྡོ་རྗེ་སློབ་དཔོན་གྱི་ཆས་ཞུགས་ཙམ་ལས་འཆམས་བྱེད་ཀྱིན་མེད་ཆོ་གའང་ཉིན་འཚམས་ལས་མི་གྲུབ་འདུག་གསུངས་པས་གཞན་ཚོའི་བྱད་ལས་དང་མ་མཐུན་པས་དགོངས་པ་ལ་འཐད་རྒྱུ་རང་མ་བྱུང་འདུག །འོན་ཀྱང་ཆོས་སྐྱོང་བྲན་དུ་འཁོལ་བའི་སྙན་གྲགས་ལ་བརྟེན་མཐོངས་ལྕགས་རྫོང་དུ་སྐུ་རིམ་ལ་རྫོང་བདའ་གནང་བའི་ཕེབས་ཞོར་ནང་སོ་དགེ་འདུན་རྒྱ་མཚོའི་ཇོ་ཇོ་ཐར་པའི་གཉེར་པས་གདན་དྲངས་ཀུན་མཁྱེན་དཔྱལ་པའི་གདན་ས་ཐར་པ་དགོན་གྱི་རྟེན་བརྟེན་པ་རྣམས་ཞིབ་མཇལ་