[A:༥༩༣]གྱི་ཚེ་སྟག་ཞོན་ཡབ་ཡུམ་གྱི་འཆམས་སྐུའི་ཞལ་རས་ལས་བདུད་རྩི་བབས། ལོ་ལོ་བཞིན་ཚོགས་བརྒྱའི་དུས་འཆམས་སྐུ་ཕྱིར་འདོན་ཁར་སྣུམ་ཕྱིས་སོགས་བྱེད་དགོས་པ་ལ་དེ་ནས་ལོ་ཤས་དགོས་པ་མ་བྱུང་ཟེར། འདར་དུ་ཡུལ་སར་ནང་པར་བྱོན་པའི་སྟག་སྣ་ནང་པའི་སྲས་མོ་ཚར་ཆེན་ཆོས་ཀྱི་རྒྱལ་པོའི་སྣག་དབོན་བྱང་སེམས་ལགས་ཀྱིས་རྡོ་རྗེ་འཆང་གི་དྲུང་དུ་མཆི་མ་དང་བཅས་མཐོངས་ལྕགས་རྫོང་ཤིན་ཏུ་གཉན་པ་ཡོད་འདུག་པས་སྲུང་འཁོར་གནང་དགོས་ཞུས་པས་དེ་ལྟ་བུ་བསམས་པ་དགའ་རབ་ཡིན། དབོན་རིན་པོ་ཆེ་གཞན་དང་མི་འདྲ་བས་སྐྱོན་མི་ཡོང་གསུངས། མཐོངས་ལྕགས་རྫོང་བདག་ཆེན་རྡོ་རྗེ་འཆང་གི་སྙེན་སྒྲུབ་ལས་སྦྱོར་གནང་ས་གསང་བའི་མགོན་ཁང་བོད་ཡུལ་ན་གཉན་པ་དེར་ལས་སྦྱོར་གྱི་བཅའ་གཞི་རྣམས་ཀྱང་ཤིན་ཏུ་འགྲིག་པ་ནས་གསང་བ་ཡིད་བཞིན་ནོར་བུ་ནས་བཤད་པ་ལྟར་གྱི་མངོན་སྤྱོད་རྒྱས་པར་གནང་སྐབས་བདག་ཆེན་རིན་པོ་ཆེའི་གསོལ་ཕོད་རེ་ནག་དང་དབུ་ཞྭ་ཡང་མཆོད་ཅིང་རྫས་ལ་རྟ་དང་བྱ་རོག་གི་སྙིང་དགོས་པ་ཆེད་དུ་གསོད་པ་མ་འགབ་པའི་རྙེད་དཀའ་ཚེ་མགོན་ཁང་སྟེང་གི་ནམ་མཁར་བྱ་རོག་སྡེར་འཛིངས་བྱས་པས་གཅིག་ཤི་ནས་ལྷུང་བ་དང་རྒྱལ་རྩེའི་ལྟག་ཏུ་མི་ཞིག་གི་རྟ་ནག་ལ་གློ་བུར་དུ་བཙན་རྒྱབ་སྟེ་འབད་མེད་དུ་རྙེད་གདབ་ལས་ཀྱི་དུས་ཤ་ཚིལ་དྲི་ཆེན་སྤོས་སོགས་ཀྱི་དྲི་ངེས་མེད་བསྲེག་མཁན་མེད་པར་འཐུལ་བ་དང་མགོན་ཁང་མདའི་བར་ཁྱམས་སུ་སྐད་ངན་འཁུན་བུ་འདོན་ཞིང་བཤུག་གླུ་ལེན་པ་སོགས་ཚུབ་ཆ་ཆེ་བས་གསོལ་དཔོན་དང་མཆོད་དཔོན་གཅིག་པུར་འགྲོ་མི་ནུས་པ་བྱུང་ཞིང༌། དམིགས་བྱ་ཨས་ལང་ཧུང་ཐའི་ཇི་བློན་པོ་དང་བཅས་པ་ལོ་གཅིག་ཙམ་ནས་ནང་འཁྲུགས་ཀྱི་