zhabs kyi dben gnas su/ /kun dga'i mdza' ba ster ba'i bsnyen sgrub la/ /kun tu lhod med lo gsum bcad rgyas bcings/ /lha sngags ye shes rnal 'byor mthar phyin pas/ /lha tshogs rang zhal gzigs sogs ngo mtshar ltas/ /lha mi'i blor 'das cho 'phrul dpag yas kyang / /lhar bcas 'gro khyod mi mngon brdzu la brten/ /cher rlom mang zhig rdul phra'i yon tan la/ /la'ur ltos zhes mkha' la 'phyar mthong tshe/ /tshe rabs du mar goms pa'i dam pa'i tshul/ /tshul min rkun po'i nor ltar sba 'di mtshar/ /me khyi'i dbyar sde pa bkra shis rtse pa mchod yon mjal thog lha sar grongs pa yar 'dren la gdan drangs chog pa dgos tshul dbon sas sde pa bsod nams rab brtan la snyan 'bul zhus pa khrol bar brten gdan 'dren gdos drag gshis lo gsum mthengs pa dang 'grig pa'i de/ 'phral du chibs kha bsgyur te bkra shis rtse chos sder phebs/ ser tshogs kyi gral dbu gnang nas dge sgrub kyi dngos po thams cad don ldan snying por smin pa'i 'bras bu sbyin bdag 'khor bcas gnas skabs lha mi dang ring min 'khor ba mtha' can du mdzad pa'i re ba yongs su bkang / rta lug tshor mchod yon du zhu 'bul mi gnang ba'ang gnas skabs su thugs su ma chun pa'i rnam pa 'dra zhig tu mchis rung ma 'ongs pa'i 'byung 'gyur mkhyen nas re zhig btang snyoms su bzhag pa gor ma chag /de yang bod du 'gyur ro cog gi rgyal ba'i bka' rnams las rgyud sher phyogs mdo lung sogs kyi rgyun sngon nas dar na'ang mdo mang gi lung shin tu dkon par gro lung pa blo gros 'byung gnas kyis stengs pa lo tsA ba rgya gar du 'tshol bar btang ba dang chos kyi rgyal po 'phags pa rin po ches spyil bu pa stag ston shes rab 'od zer la mdo mang gi lung dag pa zhig 'tshol bka' gnang ba sogs lung rgyun mtha' dag shab pa bag ston gzhon nu tshul khrims kyis gsan zhing bar skabs su rin po che grags don pa/ bka' 'gyur ba shAkya rgyal mtshan/ kun mkhyen rdo rje gdan pa sogs rgyal ba'i bstan pa rin po che gces par 'dzin pa'i sngon byon dam pa du ma'i bka' drin las dar rgyas su gyur pa dus dbang gis rim gyis 'grib cing grub mtha' so sor yang rang rang gi chos lugs kyi kha 'dzin tsam las sangs rgyas kyi bka' rnams spyi rta sgal ral bzhin du lus pa rje btsun bla ma 'di nyid kyis bde bar gshegs pa'i ring lugs kyi srol 'chad nyan rtsi sman ljon pas 'thud pa'i snying stobs kyis khur phrag par bzhes pa'i rgyud 'bum dang 'dul lung gnyis ngor dang gongs kar du gsan zin kyang / sher phyogs dang mdo mang gnyis phyogs kun tu 'tshol ba gnang bas/ 'thor klog /lcags ri ma/ dba' bshur ma/ thog mtha' bar gsum sogs nyan bshad kyi gzugs brnyan tsam las mtshan nyid dang ldan pa ma byung ba sde pa rnam gling pa sdom brtson tshogs gnyis dpal grub la mthar chags su chad med kyi klog lung yod pa'i khungs chod par brten khra tshang pa chen po mkhas grub blo mchog rdo rjer g.yu pad gser dngul sogs sku chas kyi mthun rkyen gya nom pa dang bcas lho brag phyogs su rdzong bda' gnang ba dhI tsha sprul pa'i skur bla ma tshogs gnyis dpal grub kyis lung phul ba'i sher phyogs rdzogs mtshams dang 'grig pa'i skor cig gsan ma thub rung mdo mang rnams rdzogs par byung ba dam pa'i chos kyi