mdzad/ sa skyong bsod nams rab brtan la g.yar po zhus pa'i bka' 'gyur mtshal par ma dang / chos sde'i bka' 'gyur gnyis la zhar byung du zhus dag pa'i yi ge'i 'du byed dge slong 'phrin las rnam rgyal dang / gong dkar gyi glegs bam khrod du ma bzhugs pa 'dra mtshal par ma'i steng nas lung gnang ba zhal snga nas brag sna bas sde par snyan phra phul na'ang yar bzhes rgyu thugs kyis bsnyel nas ljags lung gi bgegs su ma song bar gda'/ mdo mangs thor bu/ dkon brtsegs/ phal chen/ sher phyogs skor grub nas/ de yang sngar ngor du bsgrubs pa gnang ba de phyag len mkhan slob kha skong tshang ma khungs btsun na'ang shar chen ye shes rgyal mtshan gyis yar klungs rnam rgyal du tshag mig mkhan chen dka' bzhi tshul khrims rin cen la bsgrubs pa'i sdom rgyun yin la/ gong dkar rdo rje gdan gyi sdom rgyun la sa paN brgyud par bzhugs pa dang / phyogs de'i gdul bya rjes 'dzin la dgongs te smin drug zla ba'i tshes nyi shu'i gza' lhag pa dang skar ma rgyal 'dzom pa'i nyin snga dro sdom pa 'bul ba gnang ba'i brda chad tsam du tsar mo'i steng na bza' dkar po zhig bzhes/ phyi dro gnas brtan 'dul ba 'dzin pa chen po tshul khrims bkra shis bas mkhan slob sbrags ma/ gsang ston skyid tshal 'og mkhan po ngag dbang bstan 'dzin/ dus sgo ba rab 'byams chos rje rin cen rgya mtsho/ kha skong ba brag thog pa shAkya mchog ldan sogs dad pa'i dge 'dun grangs tshang ba'i dbus su tshigs snga ma dge bsnyen nas bzung ste sdom gsum rim gyis mnos pa'i nyi ma ri rked la yod dus bsnyen par rdzogs pa'i sdom pa thugs rgyud la bstar/ de nas zhag lnga tsam na 'dul lung khyim pa'i spyod yul du ma 'os shing rab byung sha stag dgos pa chos sde gnyis kyi gra rigs nyi shu skor gyis nyi ma gling du sku ngo sbran pas rje tshul khrims bkra shis kyis da lam bskyar bzhes gnang nas yun ring ma song yang mkhan po'i bya ba mdzad dgos par gsol ba bzhin rje nyid kyis mkhan po/ mtshungs med nyi ma gling pas las slob bstar te rtses dang chen mo byang ma pa ngag dbang bstan 'dzin gyis gtsos pa'i bsnyen rdzogs pa kha shas dang rdo rje brag sprul sku rin po che dpon slob lnga dge tshul du bsgrub pa gnang ba'i chen mo byang ma pa'i mtshan la slar byams pa bsnan te 'dogs par mdzad/ chos zhu ba po rnams kyis dkyil 'khor la brten pa'i dbang thob gshis gsang sgrog gi nyes pa mi 'byung yang rgyud dang 'brel pa'i lha'i rig gtad lta bu byung na phyag len gtsang ba'i dbang du mdzad zur bka'i dkyil 'khor la rjes gnang gi srol mi 'dug rung / sgrub thabs rgya mtsho'i kye rdor/ gsang 'dus 'jam rdor/ he ru kaHphyag gnyis pa/ bdag med ma/ gshin rje'i gshed dmar nag /phag mo lha lnga/ phyag rdor/ mi g.yo ba/ spyan ras gzigs gtso 'khor gsum pa/ gur mgon/ mgon po phyag bzhi pa/ zur bka' sna tshogs yum/ khro phu'i 'jam dkar/ phyag rdor 'gro bzang sogs spyi bka' zur bka' skabs su gang babs nas rgyud sde tshan du phye ba phal cher dang 'brel bar sngon du rjes gnang re mdzad pa'i rgyud 'bum nas bde mchog mkha' 'gro rgya mtsho la sogs pa'i sngags yas mas dkrugs pa rnams bsdebs pas mtshon mdor na chos bshad pa'i dus tshod snga phyi sogs gang la'ang