[A:༡༠༧]བཀྲས་བཏགས། རྣམ་རྒྱལ་གྱི་མཆོད་རྟེན། སྐུ་པར་ལེགས་པ། ཁ་ཐི་དམར་སེར་དང་རྒྱན་བཞི་སོགས་གོས་ཡུག་ལ། མཎྜལ་མདོང་མོ་ལྔ་བཅུ་མ་བཅས་ཁྱོན་བསྡོམས་དངུལ་སྲང་སུམ་བརྒྱ། རྟ་ལྔ། དྲེའུ་གཉིས། རས་དཀར་ཡུག་རྣམས་ཀྱི་རྟེན་སྤོམས་མཐོ་བ་དང་བཅས་བཀའ་ནན་ལྕི་བས་འབྱེད་ཀྱི་སྒོ་དོད་པས་ཡོ་གའི་བསྟན་པ་ལ་ལོ་ཙཱ་བ་ཆེན་པོ་རིན་ཆེན་བཟང་པོ་སླར་ཡང་བྱོན་པ་ལྟ་བུར་སྣང༌། གསུང་ངག་རིན་པོ་ཆེ་གྲུབ་ནས་དེང་སང་སྐུ་ངལ་གསོ་བ་དང་སྦྲགས་གསན་ཡིག་བསྒྲིགས་པ་གནང་སྐབས་ཡིན་ཞིང༌། རྡོ་རྗེའི་ཁྲི་ལ་གཡོ་བ་མེད་པར་བཞུགས་ཏེ་དམ་པའི་ཆོས་ཀྱི་འཕྲིན་ལས་གདུལ་བྱའི་རྒྱུད་ལ་ཆད་པ་མེད་པར་འཇུག་པ་ཕུན་སུམ་ཚོགས་པའི་རྟེན་འབྲེལ་ལྷུན་གྱིས་གྲུབ་བཞིན་པ་འདི་ལྟར་ལགས་སོ། །ཨ་ཧོ་དམ་པའི་ཡོན་ཏན་ནམ་མཁའི་ཚད། །འཇལ་བའི་དཀའ་ཐུབ་མེས་པོས་བསྐལ་པ་བརྒྱར། །བླངས་ཀྱང་ཕ་མཐའ་མ་རྙེད་ཟག་བཅས་ཀྱི། །གཉིད་ལ་གཡུར་ན་བདག་བློ་ཕྲ་མོས་ཅི། །ངོ་མཚར་མཛད་པ་མང་པོའི་ཚིག་ཚོགས་ཀྱི། །ཕང་ཕུང་ལོ་མས་དོན་གྱི་ཟེའུ་འབྲུ་སྒྲིབ། །ཐུན་མོང་འགྲོ་ངོར་སྨིན་པའི་འབྲས་བུའི་བཅུད། །མྱངས་ན་གཟུར་གནས་ལྗགས་ཀྱི་དབང་པོ་ཚིམ། །སངས་རྒྱས་སྲས་བཅས་ཕྱོགས་དེར་བསྔགས་པ་ཡི། །བསོད་ནམས་ཕུང་པོ་ཟད་མཐའ་གྲངས་ཡས་ན། །གདན་གསུམ་ཚང་བའི་སྡེ་དཔོན་རྟོགས་བརྗོད་གླུ། །བླངས་འདིས་བསྐལ་གསུམ་ཚོགས་རྣམས་དེང་འདུམས་སྙམ། །མ་དག་འཁོར་བ་མཐའ་བྲལ་ཚང་ཚིང་ནགས། །མི་དགེ་རྣམ་སྨིན་གཅན་གཟན་རྒྱུ་བའི་སྲང༌། །མུ་མེད་ལས་སྒྲོལ་བཤེས་གཉེན་བཀའ་དྲིན་གྱིས། །མེ་ཏོག་མདའ་ཅན་གཡུལ་དེ་གཅིག་ཏུ་ཕམ། །གངྒཱའི་རྡུལ་གྱིས་མཚོན་མིན་