[A:༢༣]པས་ཡོད་གསུང༌། རྒྱལ་ཡུམ་ཚུལ་ཁྲིམས་བཟང་མོའི་དུས་ཨེ་ཡོད་ཞུས་པས་མེད་པ་འདྲ་གསུང༌། ཟླ་གཅིག་བར་བྲག་རྫོང་མའི་བསྙེན་མཚམས་གནང་བའི་སྐབས་ཞལ་འདོན་མཛད་རྒྱུའི་གསོལ་འདེབས་ཞིག་ཞུས་པར་ཤློ་ཀ་གསུམ་པ་ཞིག་གི་ཁ་ཡིག་ལ་རི་ཕུག་དབུ་མཛད་ཆེན་མོའི་ཐུགས་དམ་ཞེས་གནང་བ་དེ་སྐབས་ཉམས་འཆར་ལྟ་བུ་ལས་དགུང་ལོ་བཅུ་བདུན་ཙམ་ལས་མི་འགྲོ་གཤིས་དེའི་འདྲའི་དོགས་གནས་ཕྱི་ནང་སུ་ལའང་མེད་རུང༌། དོན་དུ་སྐོག་གྱུར་གྱི་ཆོས་མངོན་སུམ་དུ་གཟིགས་པའི་ལུང་བསྟན་ལ་ཐུགས་ངེས་ལྷག་པར་རྙེད། རེ་ཞིག་བརྟག་གཉིས་ཐུགས་འཛིན་སོགས་གསན་སྦྱོང་མཛད། ས་ལུག་ལོ་རྡོ་རྗེ་བྲག་རྫོང་མའི་བསྙེན་ཆེན་ཟླ་བ་བདུན་མཛད་སྐབས་ནུབ་ཀྱི་མཚན་ལམ་དུ་ཧ་ཤང་གི་ཆ་བྱད་ཅན་གཟུགས་བོངས་ཆེ་བ་རྟ་པ་མང་པོའི་འཁོར་གྱིས་བསྐོར་བ་རི་ཕུག་གི་མ་ཎི་ཆེན་མོའི་ཐད་ཙམ་དུ་ཡོད་མུར་གཟིམས་ཁང་དུ་འཚངས་ནས་སྦུག་དེར་འོད་མེར་རེ་བསྡད་སོང་བ་ཐུགས་འཇིགས་ཞུམ་པའི་སྣང་བ་ཤར་ཞིང་སང་ཉིན་རྒྱ་འདྲེའི་ཆོ་འཕྲུལ་ཡིན་ནམ་དགོངས་པའི་རྡོ་རྗེ་འཆང་ལ་ཞུ་ཡིག་ཕུལ་བའི་ལན་དུ་བཟློག་འཁོར་གྱི་རྩེ་ལ་བསྐྱོན་གསུང་བ་བཞིན་མཛད་ཀྱང་རྒྱ་འདྲེ་དེ་གདུག་རྩུབ་ཆེ་བ་ཡོད་ཚོད་ནས་སྲོད་ཐུན་ཞིག་ལ་དངོས་སུ་སྡིག་པས་ཞབས་ཀྱི་བརླ་ནང་ལ་སོ་བཏབ་པ་ཕྱག་གིས་བཟུང་ནས་ཕྱིར་འཕངས་པ་ན་ཤི་ཟིན་འདུག་པས་བསླབ་སྟོན་ཞུས་པར་རོ་དེ་བཞུགས་གདན་འོག་ཏུ་ཆུག་གསུང་པ་བཞིན་བཅུག །དེ་སྐབས་སྤྱན་གྱིས་གཟིགས་པར་མ་ཟད་ཐུགས་ཉམས་ལ་ཤར་ཚད་ཀྱི་སྣོད་བཅུད་མཐའ་དག་རྡོ་རྗེ་འཆང་དབང་ཕྱུག་རབ་བརྟན་ཡིན་དགོངས་པའི་ཞབས་ས་ལ་འདེགས་འཇོག་མི་ནུས་པ་ལྟ་བུ་