[A:༢༤]བྱུང་བའི་རྒྱུ་མཚན་ཞུར་གཏང་བའི་ལན་དུ་གནས་ལུགས་རང་ངོ་རང་ཤེས་དོན་དམ་གྱི་མགོན་པོ་ཡིན། དུས་ཐམས་ཅད་དུ་བསྐྱེད་རྫོགས་ཟུང་འཇུག་གི་ཐུགས་དམ་དང་མ་བྲལ་བར་མཛོད་ཅེས་ཞལ་གདམས་གནང༌། དོན་དུ་གང་སྣང་ཐམས་ཅད་བླ་མའི་རྣམ་པར་ཤར་བ་འདི་གཞན་ལས་ཁྱད་དུ་འཕགས་པའི་གསུང་བསྙེན་གྱི་རྟགས་སུ་འདུག །རྡོ་རྗེ་འཆང་དབང་ཕྱུག་རབ་བརྟན་སྟོན་ལྕགས་སྟོད་དུ་དབང་གཞི་མཛད་ནས་རི་ཕུག་ཏུ་ཕེབས་པ་དུས་མཚུངས་སྐུ་མཚམས་གྲོལ་བ་འགྲིག་ནས་རྗེ་འདི་ཉིད་ཀྱིས་མཇལ་བར་ཕེབས་པས་དེ་ནུབ་བཞུགས་མེའི་སར་ཚོགས་ཀྱི་འཁོར་ལོའི་དགའ་སྟོན་གནང༌། བཀའ་ལས་འོ་མེ་འདིས་ལྷབ་ལྷབ་བྱས་པ་དང་དྲན་གསོས་བྱུང་མདང་རྨི་ལམ་དུ་ཐམས་ཅད་མཁྱེན་པ་ཕེབས་པ་ཞིག་བྱུང་བ་དེ་རིང་ཁྱེད་འབྱོན་པར་ལྟ་བ་འདུག་ཕེབས་པ་ཐམས་ཅད་མཁྱེན་པའི་རིང་ལུགས་འཛིན་པ་ལ་མཆོག་ཏུ་འགྱུར་བར་དོན་གྱིས་དབུགས་དབྱུང་མཛད་པ་འདྲ། ལྕགས་སྤྲེལ་ལོ་ལྷོ་གསེར་མཛོད་སེར་པོ་ནས་བྱོན་པའི་རྡོ་རྗེ་དྲག་པོ་རྩལ་གྱི་ལྗགས་བསྙེན་ཞག་ཉེར་གཅིག་གནང༌། ཡར་ཀླུངས་ནས་ཁྱབ་བདག་བཀའ་འགྱུར་བ་ཆེན་པོ་ཕེབས་པ་དང་ལྷན་ཅིག་པར་སྣང་སྲིད་ཀྱི་ཆོས་ཐམས་ཅད་རྒྱུད་གསུམ་གྱི་དྲེགས་པའི་རྣམ་རོལ་གསང་བར་རང་སེམས་གནས་ལུགས་དོན་དམ་གྱི་མགོན་པོར་ངོ་སྤྲོད་པའི་མན་ངག་གི་ཉིང་ཁུ་རྡོ་རྗེ་ནག་པོ་ཆེན་པོ་གུར་གྱི་མགོན་པོའི་གསང་འཁྲིད་ཐུན་མོང་མ་ཡིན་པ་ཟླ་བ་གསུམ་གྱི་བར་སྨིན་རྒྱས་སུ་གསན་པའི་ཚེ་ནུབ་ཅིག་གྲིབ་གནོན་གྱི་རྣམ་པ་བྱུང་བར་རྒྱུ་མཚན་ཞུས་པ་ན་ནག་པོ་ཆེན་པོ་འགྲུབ་པའི་རྟགས་སུ་བཤད་པས་ངན་རྒྱུ་མེད་ཙམ་ལས་གསལ་བར་མ་གསུངས་