[A:༣༤]སྐྱོབ་གཡེལ་བ་མེད་པར་མཛོད། ཅེས་རྣམ་བྱུང་ཞེས་པ་ས་ཕོ་འབྲུག་གི་ལོ་ཟླ་བ་དྲུག་པའི་ཚེས་དྲུག་གི་ཉིན་གྲང་ཆེན་བླ་བྲང་རྡོ་རྗེའི་ཕོ་བྲང་ནས་བྲིས། ཞེས་པ་སྩལ། དེ་ནས་རི་ཕུག་ཏུ་ཕེབས། རྡོ་རྗེའི་སློབ་དཔོན་ཆེན་པོ་རི་ཕུག་དབུ་མཛད་རིན་ཆེན་རྒྱ་མཚོ་ལོ་སྔོན་མའི་མ་ཧེའི་འཚུབ་ཀྱི་རྣམ་པ་ཡིན་ནམ་གང་ལྟར་རྒྱལ་མཁར་སྤེལ་གཞིར་སྐུ་གཤེགས་པས་གཞིས་ཀ་རྩེ་ནས་འོས་ཐོ་དགོས་ཕེབས་པ་བཞིན་རྗེ་ཉིད་དང་བླ་ཆེན་བསམ་རྒྱམ་པ་གཉིས་ཕུལ་བ། སྡེ་སྲིད་ཀྱི་ཕེབས་སྒོར་ངེད་རང་གི་འདོད་པར་རིན་ལྡིང་བླ་མ་རྙིང་པ་ཡིན་པས་འབོད་མཁན་ཐོངས་ཕེབས་པ་བཞིན་འཕྲོས་བྱུང་འཕྲལ་བྱོན་པའི་དགོངས་ཁྲོལ་ནན་ཆགས་ཞུ་བ་གནང་རྩིས་ལ་སྐུ་ངོས་ཀྱིས་རིན་ལྡིང་གི་སློབ་དཔོན་རྒྱུན་རིང་མ་སོང་ཡང་ཁྲོལ་ཆ་བྱས་པ་ཡིན། ད་ལམ་དགོངས་པ་ཞུ་རེ་མ་བྱེད་ཅེས་པའི་ལུང་ལྕི་བས་དེ་རིགས་ཀྱི་སྤྲོས་པ་དང་བྲལ་ཏེ་གསོལ་དཔོན་སྐྱིད་སྟོད་ནས་དང་ཐུགས་ནང་གཙང་གཤིས་བཀའ་གྲོས་གནང་བར་ད་ཆ་བསྐྱར་ཞུས་མཛད་ན་དགོངས་ཁྲེལ་ཡོང༌། དེ་ལས་རྒྱལ་མཁར་བླ་གཞིས་འཇགས་པའི་བཀའ་ཤོག་ཞུ་བ་འཐད་ཚུལ་བྱུང་བ་བཞིན་དབུ་མཛད་ཀྱི་རིང་འཇགས་པའི་སྨིན་གྲུབ་ཀྱང་བྱུང༌། ཟླ་བ་བཅུ་གཉིས་པའི་ཚེས་བཅུ་དྲུག་ལ་རི་ཕུག་དབུ་མཛད་དུ་ཕེབས་པའི་བསྐོ་འཇའི་གནང་སྦྱིན་དང་བཀའ་ཤོག་སྒྲོག་པར་བདེ་རྒྱས་པ་ཨ་བར་ལྷ་རྒྱལ་རྫོང་བདའ་མཛད། འདར་ནས་རྡོ་རྗེ་འཆང་ཡབ་སྲས་ཀྱིས་ཐུགས་སྲས་སེམས་དཔའ་ཆེན་པོ་སོགས་བླ་མ་ན་རིམ་གྱི་དབང་བུམ་ཆ། རྡོ་རྗེ་དྲིལ་བུས་གཙོས་པའི་བདོག་པ། ངོར་ནས་སྒྲུབ་ཁང་ཐར་རྩེ་ཀླུ་སྡིངས་པ་བཅས་བླ་བྲང་ཁག །ཉང་ཕྱོགས་ཀྱི་སྡེ་དཔོན་སྦྱིན་བདག་གཞིས་བྱེས་ཀྱི་གྲྭ་པ་ལ་