[A:༣༣]པ་ཞིག་མ་བྱུང་བར་གདའ། རྡོ་རྗེ་འཆང་གི་བཀའ་བཞིན་ཁྱབ་བདག་བཀའ་འགྱུར་པར་ཚིག་སྒྲའི་ཁྱད་ནས་བླ་བྲང་རྩེར་ཕུན་ཚོགས་དངོས་གྲུབ་མའི་ལུང་རྡོར་དབྱིངས་ཀྱི་དབང་སོགས་ཆོས་བཀའ་འགའ་ཞིག་སྩལ། མི་དང་མི་མ་ཡིན་གྱི་སྲུང་ཡིག་ཞུ་བ་གནང་འདུག་པ་འདི་ལྟ་སྟེ། ཨོཾ་སྭ་སྟི། རྒྱལ་བ་ཁྱབ་བདག་རྡོ་རྗེ་འཆང་ཆེན་པོ་འཇམ་པའི་དབྱངས་མཁྱེན་བརྩེའི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་བཀའ། དཔལ་རྡོ་རྗེ་འཇིགས་བྱེད་ཆེན་པོའི་ལུང༌། མ་ཧེའི་ཞལ་གྱི་རྣལ་འབྱོར་པ་རྡོ་རྗེ་འཛིན་པ་དབང་ཕྱུག་རབ་བརྟན་དཔལ་བཟང་པོའི་ཡི་གེ །ཁམས་གསུམ་དུ་གཏོགས་ཤིང་ས་གསུམ་དུ་རྒྱུ་བའི་འབྱུང་པོ་མི་དང་མི་མ་ཡིན་པ་ཐམས་ཅད་ཀྱིས་དགོངས་ཤིང་ངེས་རྒྱུ། ངེད་ཀྱི་རྡོ་རྗེའི་སློབ་བུ་རྒྱུད་སྡེ་འཛིན་པ་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོ་འདི་ཉིད་བསྟན་འགྲོའི་དོན་དང་རང་དོན་དུ་ཐོས་བསམ་སྒོམ་གསུམ་དང་གཞན་དོན་དུ་འཆད་རྩོད་རྩོམ་གསུམ་ལ་སོགས་པ་ལུགས་གཉིས་བྱ་བ་གང་དང་ཅི་བྱེད་ཀྱང་ཁྱོད་ཡུལ་ཁམས་སོ་སོའི་ལྷ་འདྲེ་མི་གསུམ་གྱིས་གུས་པའི་བཀུར་སྟི་མཆོད་བསྟོད་སྙན་སྤེལ་དགེ་བའི་གྲོགས་སུ་གང་འགྲོ་བགྱིད་པ་མ་གཏོགས་བསམ་གཏན་གྱི་བགེགས་དང་བར་ཆད་དུ་འགྲོ་བ་སྐད་ཅིག་ཀྱང་མ་བྱེད། གལ་ཏེ་གོང་ལས་འགལ་བ་བྱུང་ན་རྡོ་རྗེ་འཇིགས་བྱེད་རབ་ཏུ་ཁྲོས་པས་འཆི་བདག་གཤིན་རྗེའི་ཟས་སྐལ་དུ་གཏོད་པ་ངེས་པར་གྱིས། འདིའི་དོ་དམ་ཆེད་གཉེར་དགོས་པ་རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ་དང་གནོད་སྦྱིན་ཆེན་པོ་བེག་ཙེ་བ་འཁོར་དང་བཅས་པས་ཉིན་མཚན་དུ་བསྲུང་