[A:༣༦]ཕེབས། ལྷུན་རྩེ་བདེ་སྐྱིད་གླིང་ལྕགས་རི་ཁ་སྟོད་ཀྱི་མཆོད་གཞིས་ལ་བརྟེན་པའི་དབྱར་ཆོས་དགུན་ཆོས་མ་ཆད་ཙམ་ཡོད་པ་དང་དུས་མཆོད་ཆེན་མོས་མཚོན་སྒྲུབ་མཆོད་ཀྱི་རྡོ་རྗེ་སློབ་དཔོན་ལ་ཆག་མེད་འབྱོན་པ་སོགས་ཐུགས་ཁུར་ཆེ་བཞེས་གནང་བ་ན། གལ་ཆུང་ཆོས་སུ་བྱས་པའི་ཆེར་རློམ་གྱི་སྤྱོད་ཚུལ་དང་མི་འདྲ་བའི་དམ་པའི་རྣམ་པར་ཐར་པ་ངོ་མཚར་བར་མངོན། ལྕགས་མོ་ལུག་ལོ་འདར་དུ་ཕེབས་རྗེ་རྡོ་རྗེ་འཆང་གི་བཀའ་ལས། ཞ་ལུའི་གྲ་པ་ཁ་ཡ་ལྐོག་པོ་མ་ཚོའི་ཟླར་བཞུགས་པ་ལས་འདིར་བྱོན་ནས་རྡོ་རྗེ་འཇིགས་བྱེད་ཀྱི་བསྙེན་སྒྲུབ་ཅིག་མཛད་ན་ཡོང་གནང་བར། རེ་ཞིག་སྡེ་སྲིད་ནས་དགོངས་པ་མི་ཁྲོལ་ཚུལ་ཞུ་བ་མཛད་པའི་ལན་དུ་འོ་ན་བསྐྱར་བསྐོས་ཤིག་བྱས་རྒྱུན་རིང་པོ་ཞིག་མཛད་དགོས་པ་ཡོང་ཕེབས་པ་དེ་ཁོ་ནའི་ཐོག་ཏུ་སོང་བ་མངོན་མཁྱེན་ཡོད་དོ་བའི་ཅལ་སྒྲོག་ཙམ་མ་ཡིན་པར་གྲགས་པ་དོན་དང་ལྡན་པའོ། །མཁན་པོ་སྐུ་ཞང་སྙུན་ཡུན་རིང་གིས་བཏབ་སྟེ་ས་སྦྲུལ་ནག་པ་ཟླ་བར་ལ་སྟོད་དུ་གཤེགས་པའི་སྟབས་འདི་ལོ་མཁན་པོའི་འོས་ཐོ་བསྡུས་ཚེ། ཕྱག་མཛོད་དབོན་པོ་བྱང་ཆུབ་ལ་དྲི་བ་གནང་བར་རྟག་བརྟན་མཁན་པོ་ཟལ་མོ་བྲག་པའི་སྐུ་སྐྱེ་ལ་མཐུན་གྲུབ་ཡིན་ཚུལ་གཡོ་ཞུས་བྱས་པར་སྡེ་སྲིད་ཐུགས་འཁྲུལ་ཏེ་རྟག་བརྟན་མཁན་པོར་བཀའ་ཤོག་གནང་བས་ཁོང་པ་ཆོས་སྡེ་བྲག་དམར་དུ་འབྱོར། དབོན་པོ་བྱང་ཆུབ་ཀྱིས་སྤྱི་སའི་ཞུ་ཡིག་བརྫུས་མ་དང་བཅས་དབུ་ཆོས་གཉིས་བཞིས་ཀ་རྩེར་བཏང་བར་དྲི་བ་གནང་ལན་བུ་དོལ་ལྟ་གྲུབ་མི་གཅིག་ཅིང་ཚད་མའི་འདོད་མཐུན་མིན་ཚུལ་ཞུས་པས་རི་ཕུག་དབུ་མཛད་དང་ཕྱག་མཛོད་པ་གཉིས་བོས་གསུང་བ་ལྟར་ཕེབས། སྐུ་ཞབས་