[A:༣༧]སུ་རྗེ་ཉིད་ལ་སྒེར་དུ་དྲི་བ་གནང་བར་ཇོ་ནང་རྗེ་བཙུན་རིན་པོ་ཆེ་སྐྱེ་བུ་དམ་པ་གཞན་དང་མི་འདྲ་ཡང་ལྟ་གྲུབ་ཁྱད་ནས་ཀུན་མཁྱེན་བུའི་བསྟན་པར་ཕན་པ་དཀའ། ཞ་ལུ་བར་ཚར་ཆེན་ཡབ་སྲས་བཀའ་དྲིན་ཆེ་བས་རབ་གནས་གསར་ཞབས་དྲུང་དབོན་རིན་པོ་ཆེ། དེ་མིན་གླང་ཕུ་ནས་ཆོས་རྗེའི་དྲུང༌། ངོར་མཁན་པོ་ཤེས་འབྱུང་བ་གསུམ་པོ་གང་རུང་འོས་པ་འདྲ། དངོས་གཞི་རྣམ་དབྱིངས་ནས་གང་བཅད་ལས་འོས་ཅི་ཡོད་ཞུ་བ་གནང་བས་སྡེ་སྲིད་ཞལ་སྐྱེངས་ཉམས་ཀྱིས་ཞ་ལུ་པའི་ཞུ་དོན་པ་སྤྱི་ཚོགས་ལ་སྒྱུར་སྦྱང་དང་བཅས་ཟལ་མོ་བྲག་པའང་མཁན་པོ་མཛད་མི་དགོས་གསུངས་པར་བརྟེན་ཐར་པར་བྱོན། ཤིང་ཕོ་ཁྱི་ལོ་གཞིས་ཀ་རྩེར་ཁྱབ་བདག་ཞ་ལུ་པ་དཔོན་སློབ་བརྒྱད་སྐོར་ལ་གསོལ་ཕོགས་སོགས་དགོས་ཆ་ཚང་མ་གནང༌། བླ་མ་ཀུན་དགའ་དཔལ་འཕེལ་གྱིས་སློབ་དཔོན་མཛད་ནས་ཡོག་དབྱངས་ཉིས་བརྒྱ་ལྷག་ཙམ་སྦྱོང་དར་གནང༌། དེ་ནས་ཨེ་ཝཾ་ཆོས་ལྡན་དུ་ཕེབས་རིགས་བརྒྱའི་བདག་པོ་དཔལ་ལྡན་དོན་གྲུབ་ལ་ཐུགས་རྗེ་ཆེན་པོའི་དམར་འཁྲིད་སྨིན་རྒྱས་སུ་གསན་པའི་ནུབ་ཀྱི་མནལ་ལམ་དུ་རྗེ་ཉིད་ཞ་ལུའི་ཆོས་སྡེའི་ཤར་སྒོ་ནས་བྱོན་པ་དང་ཞབས་ས་ལ་མི་རེག་པར་མི་གང་ཙམ་འཕགས། མོ་ཡན་གྱི་བྱང་སྒོ་ནས་བུད་མེད་རྒྱབ་ལ་ཆུ་ཟོམ་ཁྱེར་བ་ཞིག་མཐོང་བྱུང་བ་དང་དམ་པ་ཉིད་ཀྱི་ཕྱག་ཏུ་ཕུར་པ་བུ་ཆུང་ལོ་བརྒྱད་པ་ཙམ་བྱུང་བ་བུད་མེད་དེའི་སྦྱི་བོར་བཏབ་པས་བཤང་ལམ་གྱི་བར་ཕུག་སྟེ་ས་ལ་སྦྲགས། དེ་ནས་ནམ་མཁའི་མཐོངས་ཐུགས་བློས་མི་འཁྱུད་པ་ཙམ་དུ་འཕུར་བས་ལུང་པ་ཐམས་ཅད་ཆུས་མེར་བ་ཁེངས་པ་གཟིགས་པས་འདི་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་