[A:༦༢]རྗེ་རྩེ་མོའི་ཆོ་ག་རྡོ་རྗེ་འཆང་མཁྱེན་རབ་ཆོས་རྗེས་དབང་ལྡན་ཆོས་འཁོར་དུ་བཙུགས་པའི་ཕྱག་ལེན་ཇི་ལྟ་བ། སྒོ་བཞིའི་དབྱངས་ཆོས་སྐྱོང་ཆེན་པོའི་བསྟོད་རེ་སོགས་ཞག་བཅོ་བརྒྱད་བསྒྲུབས་པའི་མཆོད་གཞིས་སྔ་སོར་རྗེ་ཉིད་ལ་གཙང་སྡེ་སྲིད་ཀྱིས་གནང་བ་གཞུང་ནས་དེ་ལམ་དུ་འཇགས་པའི་དར་རྒྱས་གཞིས་ཀ་སྦྱོར་བ་མཛད། སྒྲ་དབྱངས་ལྷ་མོའི་རྗེས་གནང་སྤྱི་འགྲོའི་གཞོགས་དྲུད་ལས་སྒྲ་ཚད་པ་ནས་བརྒྱུད་པའི་ཁུངས་བཙུན་དེ་ཤིན་ཏུ་དཀོན་པ་དང་འཇིགས་བྱེད་རོ་ལངས་བརྒྱད་སྐོར་ཀྱི་དབང་གཉིས་ངོར་དུ་མཁན་ཆེན་ཤེས་རབ་བྱུང་གནས་ལ་གསན། དཔོན་སློབ་པཎ་ཆེན་རིན་པོ་ཆེ་སྲད་ལ་ཕེབས་འཕྲོས་འདུག་པ་མཇལ་བ་ལེགས་ཚུལ་སྙན་འབུལ་མཛད་པ་བཞིན་ངོར་མཁན་པོས་བྱོན་པར། པཎ་ཆེན་རིན་པོ་ཆེས་གདན་བཞེངས་ཕྱག་བབས་སོགས་ལེགས་པོ་གནང་བས་བཀའ་གྲོས་ཐོན་པའི་ཚད་དུ་ཕྱིན། མ་ཧེ་མཆོད་པར་དམིགས་པའི་བུ་ལུགས་གཤེད་དམར་ལྷ་ལྔ་དང་ཚར་ལུགས་རྡོ་རྗེ་འཇིགས་བྱེད་ལས་གཤིན་དང་བཅས་པའི་ལྗགས་བསྙེན་གནང༌། མ་ཧེའི་བཀའ་བསྒོར་བཀྲ་ཤིས་ལྷུན་པོ་ནས་དཔོན་སློབ་ཞབས་དྲུང་ཕེབས་པས་གྲ་སྒྲིག་གིས་ཞ་ལུའི་གྲྭ་ཚང་གཞིའི་གྲྭ་པས་མ་ཁོམ་པར་རི་ཕུག་དབུ་མཛད་ཀྱིས་དྲུག་ཅུ་པ་མཛད་སྲོལ་ཡོད་པ་ལྟར་རྗེ་འདི་ཉིད་ཀྱིས་གཤེད་དམར་དྲུག་ཅུ་པའི་རྡོ་རྗེ་སློབ་དཔོན་གནང་བའི་ཆོག་གྲར་རིན་ལྡིང་གྲྭ་ཚང་ནས་གྲྭ་པ་བཅོ་ལྔ་བཟབས་མཆོར་དང་བཅས་འོངས་པར་གཤེད་དམར་ལྷ་ལྔའི་དབང་བསྐུར་རྒྱས་པར་མཛད། དབང་ལྡན་ཆོས་འཁོར་ནས་གསེར་རྔ་ཞེ་གཅིག་བརྙན་པོ་དང་བཅས་དྲུག་ཅུ་པ་སོགས་སྨིན་རྒྱས་ཀྱི་ཐུགས་ཁུར་བཞེས་པས་དཔོན་སློབ་པཎ་ཆེན་རིན་པོ་ཆེའི་དགོངས་