[A:༦༡]ཞབས་ཅུང་ཟད་བསྙུན་པར་ཕྱག་རྫས་ལྷག་རྣམས་སྐུ་རིམ་དུ་བཏང་བས་སྐུ་ཆས་དཀོན་གཤིས་ཤི་གསོན་གྱི་དོན་དུ་གྲོང་ཆོག་གི་སྒོ་ནས་གཞན་ཕན་རྒྱ་ཆེར་མཛད། ཞ་ལུ་མོ་ཡན་རྣམས་ཀྱི་དོ་དམ་བྱས་ནས་གཞི་བྱེས་ཀྱིས་དབང་གཞི་བཙུགས་པའི་འབུལ་བར་ནས་ཁལ་སུམ་བརྒྱ་ཙམ་དང༌། རྡོར་ལེགས་བཀྲ་ཤིས་ལྷུན་པོ་དང་ངོར་གཉིས་སུ་མེ་ཏོག་འབུལ་བར་རྫོང་བདའ་གནང་བའི་སྐྱེས་སོགས་ཀྱིས་གསོལ་ཐབ་ཚུགས་པ་བྱུང༌། ས་གླང་དབང་ལྡན་ཆོས་འཁོར་བས་གདན་དྲངས་ཚོགས་པ་ལ་གསུང་ཆོས་མང་པོ་འབུལ་བ་མཛད། གྲ་རྐྱང་སོ་སོས་ཀྱང་ཐབ་གདན་ཆས་སོགས་ཉེར་མཁོའི་རྙེད་པ་བསྟབ། རི་ཕུག་ཏུ་ཕེབས་སྐབས་ཁང་དྲག་ནས་ཀྱིས་ཤར་ཆེན་དུ་གདན་དྲངས། དེ་ཞོར་རྩེ་ཆེན་སྒྲོལ་མ་མཇལ་ཏེ་ཁྲུས་གསོལ་རྒྱས་པར་གནང་ནས་ཁྲུས་ཆུ་བུམ་པ་གང་བསྣམས་ཏེ་པ་རྣམ་དགའ་གདོང་རྒྱབ་རིར་སྨན་ཆུ་གྲང་ཚན་ཞིག་ཡོད་འདུག་པར་ཕེབས། དེའི་སྔོན་སྡེ་པ་ནོར་བུ་དཔོན་གཡོག་གིས་གྲང་ཚན་བརྒྱབ་ནས་ལོག་རྗེས་རྫིང་ཆུ་ཕྲན་བུ་མ་གཏོགས་བསྐམས་འདུག་པ་སྟོན་པ་སངས་རྒྱས་ཀྱི་སྐུ་ལ་སྒྲོལ་མའི་ཁྲུས་ཆུས་སྐུ་ཁྲུས་གསོལ་བའི་ཆུ་རྒྱུན་རྫིང་ནང་དུ་འབབ་པ་བྱས། གསེར་ཆོས་ཀྱི་མན་ངག་ལྟར་རྗེ་བཙུན་ཀུ་རུ་ཀུལླེ་ལ་གསོལ་འདེབས་དང་གཏོར་མ་གནང་བས་རྫིང་མེར་གྱིས་སྐད་ཅིག་ཉིད་ལ་ཁེངས་ཏེ་རྫིང་གི་ཕྱིར་ལུད་འགྲོ་བ་བྱུང༌། གྲང་ཚན་བསྟེན་པས་ཞབས་ཡོབ་ནང་དུ་མི་ཤོང་བའི་སྙུང་རོ་དེ་ཡང་ཞག་གཅིག་གཉིས་ལ་གཞི་མེད་དུ་སོང༌། ལྕགས་སྟག་ལོ་ངེད་རང་གི་རིང་འཚོའི་རྟེན་འབྱུང་གི་ཆེད་དུ་གཟིམས་མལ་སྐུ་འདྲའི་སྐུ་མདུན་དུ་རྣལ་འབྱོར་རྒྱུད་ཀྱི་བཤད་རྒྱུད་རྡོ་