[A:༧༥]དང་སྒྲུབ་སྐོར། རྩེ་མོའི་ཁ་འབར་མ་སོགས་བླ་མ་སྣ་ཚོགས་ཀྱིས་མཛད་པའི་སྒྲུབ་སྐོར་རྗེས་གནང་གི་ཡི་གེ །ཉི་མ་མདུང་གང་མའི་སྒོམ་ལུང་སོགས་དང་རྗེ་ཉིད་ཀྱི་ཐུགས་རྩོམ་པོད་ལོངས་ཙམ་ཡོད་ཚོད་ནས་རབ་གནས་ཕུན་ཚོགས་དཔལ་འབར་གྱིས་གཙོས་ཟབ་ཆོས་མང་དུ་ཞུས། ཁྱབ་བདག་གནས་གསར་པ་ཆེན་པོ་དག་ཞིང་དུ་གཤེགས་རྗེས་ཚར་ཆེན་རྡོ་རྗེ་འཆང་གི་རིང་ལུགས་འཛིན་པར་རྗེ་འདི་ཉིད་ལས་ལྷག་པ་ཞིག་མི་འདུག་པ་དང་ས་ཞལ་གྱི་རབ་འབྱམས་རྒྱུད་སྡེ་ཀུན་ལ་མཁྱེན་རབ་ཟླ་བྲལ་བར་དབང་རྣོན་ཆོས་རྗེས་འབྲང་བའི་དད་པ་ལྷག་པར་ཐོབ། ཆོས་ལྡན་གྱི་བྱ་བ་རྒྱ་ཆེ་བ་རེ་མཛད་རེས་ཀྱི་སྨོན་ལམ་ལོག་པའི་འཚུབ་ལྷོངས་རེ་ཡོང་གི་ཡོད་འདུག་པས་བརྟག་བབས་བཞིན་དཔལ་འབྲི་གུང་ཟུར་བ་རིན་པོ་ཆེ་གནམ་ལྕགས་མེ་འབར་གྱི་གཏེར་གསར་ཧཱུཾ་སྒྲུབ་རྡོ་རྗེ་གྲོ་ལོད་ཀྱི་དབང་ལུང་ཕུལ། གོང་དཀར་ཆོས་སྡེར་ཨཥྟའི་བསྙེན་ཆེན་གྱི་རིང་རྩེ་ནས་གསོལ་ཕོགས་ཀྱི་འཛིན་དང་བཅས་ཕྱིར་ཕེབས་སྐབས་ཞལ་གནད་དབབ་མགོན་པོའི་རྗེས་གནང་དེ་ཆད་པར་ཉེ་འདུག་པ་ཁྱབ་བདག་ཞ་ལུ་པར་འབུལ་དགོས་པའི་མཚམས་སྦྱོར་གྱི་ཡི་གེ་བསྣམས་ནས་ལྕགས་ཟམ་དུ་ཕེབས་པ་དཔོན་སློབ་ཐུགས་ནང་གཙང་ཞིང་དགྱེས་པའི་སྒོ་ནས་རྟ་མགྲིན་ཞབས་བརྒྱད་པའི་བྱིན་རླབས་དང་ལུང་གནད་དབབ་མགོན་པོའི་རྗེས་གནང་བྱུང་ཞིང་རྗེས་སུའང་དབང་ཆོས་མང་དུ་གསན། བཀའ་ལས། བདག་གིས་ཚེས་འདི་ལ་མཇལ་ཁ་དུས་ལ་མ་ཐོབ་ན་ཕྱི་མ་མྱུར་དུ་མཇལ་བ་དགོས་ཞུས་པས་དེ་ག་བྱེད་ཕེབས་བྱུང་བ་སྤྲུལ་པའི་སྐུ་འདི་དང་མྱུར་དུ་མཇལ་བ་ལ་དགོངས་པ་ཡིན་པ་འདྲ་ལ། གསུང་