[A:༧༦]ལས་ད་ཆ་མཚམས་ཇི་ལྟར་དམ་ཡང་སྒེར་པའི་ཞལ་ངོ་རྣམས་དང་རིན་པོ་ཆེ་རང་ནམ་ཡིན་ལ་མཚམས་འོག་ཏུ་ཕེབས་ཆོག་གནང་བ་སོགས་བཀའ་དྲིན་བསམ་གྱིས་མི་ཁྱབ་པ་བསྐྱངས། དངུལ་གདུང་བཞེངས་དུས་སྐུ་རྒྱུར་ཕན་པའི་སྲང་བཅུ་གཅིག་ཕུལ་ཞེས་གསུང༌། གོང་དཀར་སྣེའུ་ཁང་གསར་དུ་བཞུགས་སྐབས་མནལ་ལམ་དུ་རྗེ་ཉིད་ལྕགས་ཟམ་གྱི་ཀཀྞི་ངོས་ནས་ཞལ་ཤར་དུ་གཟིགས་ནས་ཕེབས་པ་དང་ཤར་ནས་འཕྲེད་དེ་ལ་གྲུབ་ཐོབ་ཐང་སྟོང་རྒྱལ་པོ་མི་ལྤགས་ཀྱི་ན་བཟའ་གྱོན་པ་ཞིག་བྱོན་བྲག་རྩེར་བཞུགས་ནས་གཡང་གཞི་དེ་ཐེངས་གསུམ་བརྡབས་སོང་བར་རྗེ་བླ་མས་དྲི་བ་ཞུས་པ་ན་ལྕགས་ཟམ་པ་དང་ཁྱེད་ལ་སྡང་པའི་དགྲ་ཞིག་བསྒྲལ་བ་ཡིན་གསུང༌། ད་ཅི་དྲག་ཞུས་པས་ངན་སོང་སྡུག་བསྔལ་མ་མྱོང་སོགས་སྨོན་ལམ་ཐོབ་གཞན་བྱེད་རྒྱུ་ཅི་ཡོད་གསུང༌། དེ་ནས་མི་ཞིག་གིས་ཁྱེད་ཀྱིས་ལྕགས་ཟམ་ལ་རབ་གནས་གྱི་ཟེར། གཅིག་ན་རེ་ལྕགས་ལ་འགྲོ་མི་ནུས་ཟེར་བ་ལ་ང་ལྕགས་ཟམ་པའི་བུ་ཆེན་འགྲོ་མི་ནུས་པ་ཨེ་ཡིན་གསུངས་ལྕགས་ཟམ་གྱི་སྟེང་གི་ནམ་མཁའ་ལ་འཕུར་ནས་ལྕགས་ཟམ་དང་དགོན་པ་ལ་རབ་གནས་གནང་བ་བྱུང་བར་གདའ། ལྕགས་གླང་ཟླ་བ་དང་པོ་ནས་བཟུང་གོང་དཀར་རྡོ་རྗེ་གདན་དུ་ཐོག་མར་གེགས་སེལ་ལ་ཧཱུཾ་སྒྲུབ་ཅིག་གནང་རྗེས་ཨཥྟའི་བསྙེན་ཆེན་བཅུ་ཆའི་སྦྱིན་སྲེག་དང་བཅས་པ་ཧོར་ཟླ་བཅུ་གཅིག་པ་ཚུན་ལ་གེགས་མེད་དུ་ལེགས་པར་གྲུབ་པ་ནི་སྙན་བརྒྱུད་ཚད་མ་བཞི་ལྡན་གྱི་བསྟན་པའི་རྩ་བ་ཚུགས་པ་ལྟ་བུར་སོང༌། དཔོན་སློབ་པཎ་ཆེན་རིན་པོ་ཆེ་སྐུ་ན་མཐོན་པོར་ཕེབས་པའི་ཕྱོགས་འབྱོན་མ་ཐུབ་གཤིས་ཀུན་སྤངས་གནང་