[A:༨]འབངས་རྣམས་བདེ་སྐྱིད་ལ་སྤྱོད་པའི་ས་སྟོད་མངའ་རིས་སྐོར་གསུམ། སྨད་མདོ་ཁམས་སྒང་གསུམ། བར་དབུས་གཙང་རུ་བཞིར་གྲགས་པ་ལས་རུ་ལག་གི་སའི་ཆ་ས་ཧོར་མཆོད་ཡོན་གྱི་དུས་ཆེ་གསལ་ཆེན་མོའི་ཚེ་ཁྲི་སྐོར་བཅུ་གསུམ་དུ་དབྱེ་བ་ལས་ཞ་ལུ་ཁྲི་དཔོན་གྱི་ཆབ་འབངས་སུ་གཏོགས་པ་འཆི་མེད་ཀྱི་གྲོང་ཁྱེར་ས་ལ་འཕོས་པ་ལྟ་བུ་ཉང་སྨད་ཡིན་ལ། དེ་ཡང་མངའ་རིས་སུ་བོད་ཀྱི་ལྷ་བཙན་པོའི་གདུང་བརྒྱུད་དྲི་མ་མེད་པ་ཡེ་ཤེས་འོད་དང་བསྟན་པ་ཕྱི་དར་གྱི་ལོ་ཙཱ་བ་རྣམས་ཀྱི་ནང་ནས་མཆོག་ཏུ་གྱུར་པ་སྤྲུལ་པའི་སྐྱེས་མཆོག་རིན་ཆེན་བཟང་པོ་གཉིས་ཀྱིས་ཐུབ་པའི་རིང་ལུགས་དར་རྒྱས་སུ་མཛད་པའི་ཚེ་ལོག་པར་འཁུ་ཞིང་འགྲན་ཟླ་ཅན་ཞང་ཞུང་གི་བོན་རྣམས་ཕྱོགས་གཞན་དུ་བསྐྲད་པས་ཐུན་མོང་གི་རྫུ་འཕྲུལ་ཐོབ་པའི་བོན་ཞིག་གིས་དམོད་བོར་ནས་གཤང་ནམ་མཁའ་ལ་འཕུར་བ་སོང་བའི་རྗེས་སུ་འཁུན་དིར་རི་རི་འཕུར་ནས་འོངས་ཏེ་ཉང་སྨད་གྱིས་ཕྱོགས་རྒྱང༌། སྐྱི་ལི། མག་གསུམ་ཟེར་བའི་མག་གི་ཕུར་པ་ཕུག་གཅིག་ཏུ་ཡུལ་ཆགས་ནས་གཞིས་བཟུང་སྟེ་ཕ་ཚན་མང་དུ་འཕེལ་བར་བོན་རིགས་འཁོན་ཚོ་གཤང་འཕུར་དུ་གྲགས། རུས་རྫ་ཡིན་པས་ཐམས་ཅད་མཁྱེན་པ་བུ་སྟོན་རིན་པོ་ཆེར་འཆི་བདག་འཇོམས་པའི་བསྟོད་ཆེན་བསྐུལ་བ་པོ་བླ་མ་རྫ་པ་ཟེར་བའང་འདི་པའི་རིགས་སུ་གཏོགས། མི་རབས་མང་ཞིག་གི་བར་བོན་གཡུང་དྲུང་གི་མན་ངག་ལ་མཁས་པས་གྲོང་ཆོག་ལ་ཤིན་ཏུ་བྲིན། རིང་ཞིག་ལོན་པ་ན་རྫ་རིགས་ཀྱི་བོན་ཞིག་གིས་སྐུ་ཞང་རྡོ་རྗེ་འཆང་མཁྱེན་རབ་རིན་ཆེན་མཆོག་གྲུབ་ཀྱི་ཞབས་ལ་ཐུག །མཁྱེན་རབ་རིན་པོ་ཆེས་གཞན་ཕན་ཆེ་བར་དགོངས་ཏེ་གསོ་བ་རིག་པའི་གཞུང་ལུགས་བསླབ་ཏུ་