[A:༩]བཅུག་པར་བདུད་རྩི་སྙིང་པོ་ཡན་ལག་བརྒྱད་པ། རྩ་བཤད་མན་ངག་ཕྱི་མ་སྟེ་རྒྱུད་བཞིར་གྲགས་པ་གཙོ་བོར་གྱུར་པའི་གཞུང་མན་ངག་ལག་ལེན་རྣམས་སློབ་དཔོན་མཁས་པ་མང་དུ་བསྟེན་ཏེ་དཔྱིས་ཕྱིན་པར་སྦྱངས། ཁྱད་པར་སྨན་གྱི་ལྷ་མོའི་པྲ་སྒྲུབ་ཀྱི་སྒོ་ནས་དཔྱོད་པ་དོན་རིག །མཐོང་བ་ཡུལ་རིག །ཐོས་པ་སྒྲ་རིག་གསུམ་ལ་བརྟེན་མི་དགོས་པར་ནད་འདི་ཡིན་དང་སྨད་དཔྱད་བཅོས་ཀ་གང་འཕྲོད་མཐའ་དག་སེམས་ལ་ཝལ་གྱིས་འཆར་བའི་ཐུན་མོང་གི་མངོན་ཤེས་གྲུབ་པས་ལྷ་རྗེ་བྱིངས་ལས་ཁྱད་ཞུགས་པའི་གཞན་ཕན་གྱི་འཕྲིན་ལས་ཆེས་ཆེར་འཕེལ་བས་དྲུང་འཚོ་ཆེན་མོར་གྲགས། དེའི་སྲས་འཚོ་བྱེད་བསྟན་པ་གྲགས་པ། དེའི་སྲས་འཚོ་བྱེད་སངས་རྒྱས་གྲགས་པ་ནི་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གིས་ཐུགས་ལ་བཏགས་ནས་རོག་ཚོ་བྱང་པ་སྨན་གྲོང་རིན་པོ་ཆེ་ཞེས་ཚེའི་རིག་བྱེད་ཀྱི་གཙུག་ལག་ལ་གཞན་དྲིང་མི་འཇོག་པའི་མཁས་པ་ཆེན་པོ་གང་དེའི་དྲུང་དུ་སློབ་གཉེར་ལ་རྫོང་བ་སོགས་ལུགས་གཉིས་ཀྱི་སྒོ་ནས་བདག་རྐྱེན་མཛད། བསླབ་སྦྱངས་ཀྱང་མཐར་ཕྱིན་ནས་ཉང་གཞུང་དུ་དབོན་ཚང་སྨན་ཁང་ནས་ཞེས་སྤྱི་མཆོད་ཆེན་པོར་གྱུར། ཡབ་ལྷ་རྗེ་དེ་དང་ཆོ་འབྲང་ནི་སྔོན་གྱི་ལྕེ་ལོ་ཙཱ་བ་ཁྱི་འབྲུག་དང་ཛྙཱ་ན་སིདྡྷི་སོགས་ལྕེའི་གདུང་རབས་རིམ་པར་བྱོན་པ་ལས་བར་སྐབས་སུ་ཤར་རྒྱལ་པོའི་ལུང་གིས་ཞ་ལུ་ཁྲི་དཔོན་དུ་བསྐོས་ནས་ལུང་ལག་རྟགས་ཀྱིས་མངོན་པར་མཐོ། དཔལ་ལྡན་ས་སྐྱ་པ་བདག་ཉིད་ཆེན་པོ་བཟང་པོ་དཔལ་གྱི་དུས་གོང་ནས་ངའི་བླ་མའི་གདུང་རབས་ཆད་ན་མི་ཡོང་བས་བཙུན་མོ་དྲུག་ལེན་པར་ལུང་བྱུང་བ་བཞིན་དཔོན་ཆེན་ཨང་