[A:༩༦]ཀྱི་བེའུ་བུམ་རགས་རིམ་གྱི་ལུང་སོགས་དམ་པའི་ཆོས་ཀྱི་འཁོར་ལོ་རྒྱ་ཆེར་བསྐོར་བའི་ཚེ་གནས་གསར་དཔོན་དང་འདར་པ་ཆོས་མཛད་ལ་ཕོགས། ཆོས་རྗེ་བཅོ་བརྒྱད་པར་ཟུར་གསོས། དབང་ཆོས་གནང་བའི་ཕྱག་དཔེ་སོགས་དགོས་ཆ་མཐུན་རྐྱེན་ཐམས་ཅད་བསྒྲིགས། མཁྱེན་རབ་ཀྱི་དབང་ཕྱུག་བཅོ་བརྒྱད་ཆོས་རྗེར་ཀླུ་སྒྲུབ་ལུགས་ཀྱི་བཅུ་གཅིག་ཞལ་གྱི་དབང༌། ཀུན་མཁྱེན་རོང་པོ། རྡོ་རྗེ་འཆང་ཀུན་དགའ་བཟང་པོ། མུས་ཆེན་སངས་རྒྱས་རིན་ཆེན་གསུམ་གྱི་བཀའ་འབུམ་གྱི་ལུང་གསན། ཞབས་དྲུང་དཔོན་ལ་ཆིག་བརྒྱུད་ཧ་ལ་ནག་པོའང་ཆོས་ཀྱི་བདག་པོར་དགོངས་ཏེ་རྫོགས་པར་སྩལ། ཞབས་པད་བརྟན་པའི་རྟེན་འབྱུང་དུ་བདེན་བརྗོད་ཀྱི་ཚིགས་བཅད། དབུ་ཞྭ་ནས་བཞུགས་འདིང་བར་གྱི་ན་བཟའ་ཡོངས་རྫོགས། བཀྲ་ཤིས་པའི་དར་དཀར་དང་བཅས་ཕུལ། སྐྱིད་དཔེ་ནས་དང་དར་མོ་ནས་སྒོ་བསྟུན་གྱིས་རྩ་ལྟོ་སྦྲགས་མའི་སྐུ་སྤྱོད་ཕུལ་བས་བསྙུན་རོ་གཞི་མེད་ལྟ་བུར་གདངས། ངེད་རང་གིས་གསར་བསྒྲིགས་བདེ་མཆོག་ལ་ཞུ་དག་ཞིབ་ཏུ་མཛད། ཧོར་ཟླ་བཅུ་གཅིག་པའི་ནང་དུ་གདན་ས་གང་ནས་བདག་ཆེན་རིན་པོ་ཆེ་ཡབ་སྲས་ཕེབས་སྐབས་རྗེ་ཉིད་པོ་ཏ་ལར་སྟན་ཆགས། ཡབ་སྲས་གཉིས་དང་ཕྱོགས་མཚུངས་སུ་ལོ་ཆེན་རིན་བཟང་གིས་སྤྱན་དྲངས་པའི་མགོན་པོ་ཤིང་དྲུང་མ་དང་གནམ་ལྕགས་རྡོ་རྗེ། རྗེ་བཙུན་རིན་པོ་ཆེ་གྲགས་པ་དང་འཕགས་པ་རིན་པོ་ཆེ་གཉིས་ཀྱི་དབུ་ཐོད། ས་པཎ་གྱི་ཞུན་ཐིགས་འཇམ་དབྱངས་སེང་ཞོན། སློབ་དཔོན་པདྨའི་ཕྱག་གི་པད་ཕུར་ཁམས་གསུམ་རྣམ་རྒྱལ་དང་བསྙེན་ཕུར་ཆུ་བོ་གྱེན་བཟློག །མཁར་ཆེན་བཟའི་ཕྱག་རྡོར། ཚར་ཆེན་ཆོས་ཀྱི་རྒྱལ་པོའི་སྐུ་ཤམ་ལ་འདྲ་སྐུ་བྲིས་པ་