[A:243]bar thugs shin tu dgyes te/ slad nas rim gro dang spang blang gi bslab ston bka' sam rim gro'i rgyur dngul srang bzhi bcu zhe lnga bka' drin du stsal/ dpon tshong rin po ches kyang bslab ston zhib rtsol gnang nas 'khris su bcar/ 'di skabs rje btsun chen po/ g.yag rong rnam gnyis/ mkhyen rab chos rje/ gong ma de nyid sogs bla ma dang yi dam chos srung du ma/ dpa' bo mkha' 'gro dur khrod kyi mthong snang dang / skabs 'gar rgya 'dre mang pos rtsod pa byed pa dang / cho 'phrul sna tshogs ston pa/ a tsa ra'i gzugs kyis mtshon cha'i 'khrul 'khor byed pa sogs 'khrul snang du ma byung / gong gi bka' bzhin rim gro ba rnams la zhabs tog dang yon shin tu bzang ba mdzod pas bsgrubs/ 'tsho mdzad kyis 'phrod bsten dang / nad g.yog mgron gnyer rin chen dang / gsol dpon kun bzang gnyis kyis cag thon dang / mdzod pa/ bla ma mdun grogs pas gtsos nang 'khor skya ser tshang ma dang / nA lendra'i bla khag dang tshogs chen dgon lag so sos nye ba dpal gnas dang / gsang sbug mi ser rnams so so nas 'byor bstun gyis 'bul ba/ tshogs 'khor sogs zab rgyas kyi rten 'byung dang / rim gro khur blangs kyis bsgrubs pas nad las thar te lus kyi shed che ba rang ma byung kyang gong sa chen po mjal 'dod kyi phyag dbang du phyin pas brtse 'dzin gyis dgyes tshor dang / nad mjug skyong dgos tshul gyi bslab ston dang gnang sbyin stsal/ mchod dpon lags/ dge slong rin po che/ dge slong ngag dbang dkon mchog /dpon tshang sku zhabs sogs phyag phyi drag gras rnams kyis dgyes tshor gyi gsung 'phros dang / kha btags che ba'i gnang sbyin stsal te chos grar 'byor/