[A:275]spyan drangs/ 'phags pa rigs gsum mgon pos sems can thams cad sangs rgyas kyi sar bskrun pa'i phyir jo bo 'jam dpal rdo rje'i sku brnyan sprul pa'i zlos gar gyis bzhengs pa a ti sha dang 'brom gyi thugs dam rten sangs rgyas dngos dang khyad par ma mchis pa mgo thog tu bzhag ste yid rtse gcig tu smon lam btab pas byin gyis brlabs pa'i rtags su lus rtse bun ne ba/ yid brjod med du dar cig gnas/ jo bo nyid dang rten gtso kha shas la gser gsol dang / snyan shal gzabs pa/ g.yu/ byi ru/ mu tig sogs mchod pa rgyas par phul/ dgon gong sogs lha khang rnams zhib tu mjal/ dkor gnyer rnams gus pa'i rnam 'gyur gyis nang rten gang yod zhib par bstan/ gling skor du phyin/ shug pa ming chen rnams dang / bsod nams can thar lam du bgrod pa'i dur khrod bcas mjal/ snga sor gyi las 'brel zhig yin nam/ byin rlabs kyis nam mkha' g.ya' dag cing 'ja' sprin du ma dang / sems bde song nge ba'i ngang nas gnas su sdod spro bar gyur/ snying rje drag pos bskul te bdag gzhan brje ba dang / ngan 'gro'i sems can rnams thar lam du 'god pa'i smon lam u tshugs su btab/ dad ldan gyi bla grwa kha shas kyi dgongs bzhed ltar gong sa chen po'i zhabs brtan phran bu rang gis zhus pa mkhyen brtse nus mnga' ma'i lung byas/ de nas rim gyis bskyod de kun ra'i thad du 'byor/ grwa rigs dang yon bdag du ma 'dus/ rgyun gyi dbang po nas bla ma dang / las tshan so so'i rta bsu dang / thab bsu rgyas par 'byor/ dgon gnas su nye ba na dge 'dun rnams gyis gdugs/ rgyal mtshan/ 'phan/ sil snyan/ rnga/ 'khar rnga/ rgya gling sogs kyi