[A:294] gtong sgo sogs kyi 'gro gron che gshis dang / chos gzhis cher zhan pa dang bcas lo gsum re nas 'phen yul stod smad du dbang gzhis byed dgos kyin yod pa'i stabs/ skabs shig 'jog po phyin skabs khrom dbang gi dus nam mkha' 'ja' 'od kyis khengs pa'i dbus su mkha' 'gro rnams kyis mchod pa'i yo byad du ma dang bcas te 'ja' tshon gyi mdo le lta bus btegs pa'i dkyil du rje btsun mkha' spyod gtso mo bzhugs pa'i zhal mngon sum du mthong bas mos gus dung dung / sems dga' bde'i rang bzhin du dar cig gnas pa ni skye ba snga ma nan tan du bsgrubs pa'i nus mthu dang / gnas der rA hu la badzra dang / khyung po rnal 'byor gyi sgrub gnas su song bas byin rlabs mngon du stsal bar 'dug go /khyab bdag dang po'i sangs rgyas gdon ma'i mgon/ /rgyu skar bdag po sprul pa'i dkyil 'khor du/ /rigs dbon dam pa gtsor gyur skal bzang la/ /smin byed dbang gi sa bon legs par btab/ /de tshe 'phags pa'i yul nas dzwa ki zhig /lhag pa'i lha yi thugs rjes legs bskul nas/ /gu ru khyed kyi dbang rdzas 'di na zhes/ /bgrang phreng dung chos khyad mtshar skyes su byin/ /sprul zhing mkha' la spyod pa'i gnas kyi gtso/ /ring nas bskyangs pa'i yi 'ong lha mo des/ /skye bar 'bral med rjes su 'dzin pa'i brdar/ /sku yi snang brnyan mngon sum gsal bar bstan/ /khyung 'bum gyis 'bul skyel phyir rdzong sogs rim sel sngar 'khyud dang / pho brang chen por gong sa yas phyin mjal khar phyin par bdag rkyen gzhan dang mi 'dra bar bka' drin bskyang / rdo rje 'dzin pa chen po dge slong rin po cher rta mgrin yang gsang gi dkyil 'khor du bka' dbang rgyas