[A:328]mched mjal te mjal dar phar phul tshul gnang zhus/ gzims chung du gsol ja bzhi'i ring lugs gnyis kyi bka' lung zhib par gyur/ phyi nyin rta shin tu legs pa/ dar gos/ ras sogs 'bul tshan rgyas par phul/ yum drung la tshan grangs dang / zhabs phyi rnams la'ang so sor ster sbyin byas/ ston mo dpangs mtho ba stsal zhing / dpon sogs la khri chen nas grub thob chen po'i lugs kyi tshe dbang zhig stsal song / phyi nyin lhun po rtser sku zhabs su mjal khar phyin dus/ zhabs phyi rnams kyis mjal dar bcas bsu bar mdzad/ rta sogs 'bul dpangs mtho bar phul/ byang gter gyi tshe dpag med kyi tshe dbang zhus/ 'ong khar gnang sbyin byin rten sogs rgyas par gnang zhing / lugs gnyis kyi bslab ston bka' drin bskyangs/ phar yang zhabs pad yun ring du brtan cing bstan pa'i 'dzin skyong sogs snyan 'bul zhus/ chos sde dang klu sdings dus mchod mjal du phyin/ rten rnams la snyan shal mchod pa sogs dngos bshams yid sprul gyi mchod pas mchod/ bla brang du 'byor nas zhabs drung sku mched la tshe dbang zhig phul/ dar ras sogs gnang sbyin rgyas par stsal/ phyi nyin bstan 'gro'i dpung gnyen du zhabs pad yun ring du brtan ngos/ bstan pa'i 'dzin skyong sogs lugs gnyis kyi snyan 'bul rgyas par zhus te/ phyir 'ong skabs skyel mar rdo gcal bar pheb/ so so'i phyag mdzod khag sogs kyis rgyang tsam bar rta skyel mdzad/ dar ras sogs kyi ster cha byas/ de nub 'tshal du bsdad/ rim gyis sgo ba la brgyud yangs pa can du 'byor/ ya gir chu'i stabs lam du'ang gzugs gzhi bde ba rang zhig ma byung bas/ 'phrod res zla bo mang ma rnams stod lung phyogs su btang / nged drug tsam gyis yo re'i chu tshan du phyin