[A:357]lo bcu drug bcu bdun tsam lon pa sprul pa'i sku'i cha lugs dbu'i gtsug tor dang bcas pa 'khor rnams kyang chos gos rnam pa gsum gyis brgyan pa du mas bskor ba zhig dang mjal ba na phyag grangs med pa btsal te byin rlabs zhus pas dad mos kyi snang ba dpag tu med pa byung zhing / rjes su snye thang nas mjal kha zhu dus khams gsum chos kyi rgyal po mchog gi sprul pa'i sku drug pa chen po dang mjal ba'i tshe sngar gyi rmi lam dang sku'i dbyibs shin tu mthun par 'dug pas rmi lam la nges shes rnyed/ zla ba dgu pa'i nang du pho brang chen po nas sa dbang gser gyi 'khor los sgyur ba chen po'i lung gis skyabs mgon lnga pa chen po nyid sku'i bkod pa dgyes mdzad rdo rje'i thugs kar bsdu ba'i tshul bstan kyang / slar yang rigs brgya'i khyab bdag mchog gi sprul pa'i sku drug pa chen por bstan te mi ring bar lugs brgya'i sgo 'phar phye pa'i gnas pho brang chen po ri bo gru 'dzin du chibs kha bsgyur te bstan 'gro'i dpung gnyen dam par zhabs zung mi 'jigs seng khrir bkod pa'i dga' ston legs 'bul gyi gra sgrig bka' drin che ba'i gtam tshor 'phral 'gro ba spyi dang khyad par bdag cag mgon med pa rnams kyi skyabs mgon du zhabs pad yun ring du brtan pa zhig 'ong bsams kyang / de lta bu 'ong ba bsam sems dran med lta bur gyur kyang / legs par bsam tshe zhing khams su pheb nas lo de tsam song 'dug kyang 'khor los sgyur ba chen po'i bka' drin gyis sems can thams cad rdzogs ldan ltar du byams pas skyong bar gnang zhing / khyad par mchog gi sprul sku rin po che'ang sku tshad longs dang mjal bas gus zhabs pa'ang de bar ma shi ba bsod nams che bsam zhing gzugs