[A:382]'gyur sogs sku gsung thugs rten du mar hor zla bcu gcig pa'i nyer gnyis res gza' nyin mor byed pa dang / rgyu skar me bzhi dgyes rgur spyod pa'i 'grub sbyor bzang po'i nyin nged khu dbon/ mchog sprul rin po che/ mtshungs med rngog ston chen po sogs dpon slob bzhi bcu skor gyis/ khyab bdag rnam snang chen po'i cho ga la brten pa'i rab tu gnas pa legs par byas thog rgyan drung la yon bdag bsgos/ der bstun tshogs chen la'ang zhabs tog shin tu rgyas par bcas cho ga nyin gang ma zhig zhus/ sde dge'i gnyer pa chos 'phel/ tsha ba rab gsal bla ma/ dbu mdzad a khu sogs khams 'grul ba mang bar 'byor pas/ rta/ ja sogs kyi ster sbyin rgya cher byung bar bsngo smon gyi rgyas 'debs yang dag byas/ 'grul pa don gnyer kha shas la mkha' spyod gtso mo'i khrid cig byas shing / lo mjug gi rim gro sogs sngar rgyun ltar byas/ dgon khag gi chos ra dang gzhung sa chen po'i mjal kha sogs dbon nas mdzad/ lcags sbrul lo gsar tshes kyi lo gsar dang / tshe sgrub/ mkha' spyod gtso mo'i bsnyen pa zla gcig byas/ nad ro langs pa dang dbon rin po che'ang gzhis nas cung zhig sku ltem pa bcas kyis mang ja/ grwa ja/ chos sgrogs/ bskang ba sogs byas/ khams gsum chos kyi rgyal po lnga pa chen po de nyid kyis gsung ngag rin po che 'di nyid nyams len phyogs re tsam ma yin par bstan pa yongs rdzogs kyi nyams len mdo rgyud thams cad kyi don gyi bcud phyung ba lam 'bras bu dang bcas pa'i gdams ngag zab mo yin pa nas tshogs bshad 'di 'chad nyan 'phel bar 'dug kyang / slob bshad thun mong ma yin pa