[A:202]'bul dang bsngo smon gyi rgyas 'debs smin rgyas su byas shing / 'di lta bu'i lha khang bzo bkod phun sum tshogs shing / nged rang nas dka' tshegs kyis bsgrubs pa 'di la gra pa phal cher khams par song ba dang / bod pas kyang khams pa'i mig ltos kyi zhabs phyir zhu ba bcas chud zos song dogs shin tu che bar 'dug pas rjes 'jug rnams kyis zhal bkod kyis khyab pa dang / tshang mas cag thon mdzad par gsol ba 'debs so/ /e ma mchog gsum bsti gnas gtsug lag khang / /gsang chen dbyar gyi rnga gsang sgrog pa'i gnas/ /rmad byung dge 'dun 'du ba'i pho brang 'dir/ /ngo mtshar bkod pa'i snang brnyan tshar du dngar/ /rgyal ba zas gtsang sras kyi sku nyid dang / /rgyal ba mar me mdzad dang byams mgon te/ /rgyal ba rnam gsum gtso bor bzhugs pa la/ /rgyal ba'i rgyal tshab gnas brtan rnams kyis bskor/ /dharmA ta la rgyal po ha shang dang / /gnas g.yog gzhan yang chu brag shing la sogs/ /ngo mtshar sprul pa'i bzo bos bskrun pa'i tshe/ /bi shA karma bskyengs te sum rtsen bros/ ngos logs ldebs bris rtsa brgyud bla ma dang / /yi dam lha tshogs chos srung nor lhar bcas/ /gzhan yang ngo mtshar bkod pa'i bye brag gis/ /brgyan pa dad stobs brtson pa'i mthu yis grub/ /de ltar mchog gsum 'dus pa'i gzhal med khang / /rten dang brten par bcas pa'i tshogs rnams la/ /'og min zhing nas ye shes sems dpa' rnams/ /mngon sum spyan drangs gnyis med tshul gyis thim/ /a ho kha ba'i ri na rgyal ba dang / /de sras rgya mtshor bcas pa mngon sum du/ /