[A:113]grwa ba'i dge 'dun rnams la sku gsung thugs yongs su rdzogs pa'i rdul tshon gyi dkyil 'khor du thun mong byis pa 'jug pa'i dbang bdun/ gong ma/ gong chen/ bdag po chen po'i dbang dang bcas pa tshigs gsum thob pa'i rnam gzhag dang bstun nas rgyas par mdzad de/ thun mong zhes pa lcags khyi lo 'o skol gyi rnam 'dren shAkya'i rgyal po des shrI dha nya ka Ta kar/ rgyud thams cad kyi rgyal po dpal dang po'i sangs rgyas dus 'khor stong phrag bcu gnyis pa gsungs pa'i dus chen nag ba zla ba'i gza' skar dus tshes bzang por skyabs mgon mtshungs med dam pa 'di nyid longs spyod rdzogs sku'i chas kyis bklubs te gar dpon du pheb/ sa chog gi gar nyams dgu'i rol bas mngon par dpa' ba mthong thos kyi skye bo rnams snang ba 'gyur nus pa dang / phur gdab/ sta gon/ sbyin sreg /mchod gar dang bcas sgrub mchod bdag 'jug phyag len phra mo tshun chad kyang ma 'phyugs shing 'gad gtsang bar 'dzugs par mdzad/ sa skyong chen pos kyang 'dzugs ston dang rgyun gyi mang 'gyed sogs kyang phal gyi blor mi shong ba lta bu'i bsnyen bkur rgya che la dngos gtsang bar bsgrubs par mdzad do/ /sa skyong chos rgyal chen po de nyid dbyar dbyar mthong dang / ston thog bsdu ba sogs la rdzong 'og nye skor rnams su pheb srol yod par/ de skabs kyang 'bral med du pheb ste/ sgrub thabs rgya mtsho sogs spyi bka' dang / zur bka'i dbang byin rlabs rjes gnang gi rigs rgyun du chag med lta bur 'bul bar mdzad/ lo 'di'i ston mjug /sa skyong mchog nas 'bul ba snga phyir stsal ba rnams kyis mtshon dad ldan gyi dngos po rnams chud mi za ba'i phyir/