[A:159]shin tu mtha' chod pa/ lus sbyong nyi shu pa dang / phrin las so gnyis sogs 'khrul 'khor gyi phyag khrid bcas/ mdor na phyag len phra mo tshun chad kyang ma nyams pa bdag chen rdo rje 'chang sogs mkhas grub gong ma de dag mngon sum du byon pa lta bu'i sgo nas bka' drin chen pos rjes su bzung ba'i tshe/ snang gsum gyi skabs der ri klung thams cad kha bas dung mdog tu btang ba sogs tshar lugs bla ma gong ma kha shas kyi rnam thar na bstan pa dkar 'byams su 'gro ba'i ltas yin gsungs pa de mngon du gyur pa lta bu'i dge mtshan dang bcas pa ste/ 'di dag zhib tu rtogs par 'dod na kho bo'i thob yig ltar ro/ /de skabs gsung ngag zhu mir nged rang mched gnyis/ rtse gdong sprul pa'i sku mkhyen rab bstan 'dzin lhun grub/ mchod dpon/ gsol dpon/ rje de nyid kyi zhabs phyi gsum/ rtse gdong sprul pa'i sku'i zhabs phyi gnyis rnams snang gsum skabs yod cing / de dus drung yig kun sangs nas snang gsum gyi bka' khrid nged tshor gnang ba ste grol 'phral gsang sngags pho brang duu zhus 'dug pas nyin rang po dang nam phyed yol bar gsung chos kho nar 'gor/ de nas mnal cung zad re mdzad de tho rengs snga mo nas thugs dam nyams bzhes rnams bka' drin bskyangs pas sku shin tu ngal ba de sems kyis ma bzod par sems bskyed chen mo nas bzung drung yig kun dga' sangs rgyas kyang lhan cig la yod cing / thog mtha' bar gsum du gser dngul gos dar sogs zang zing gi 'bul ba dang dkar spro phran bu/ grol nyin tshogs kyi yo byad rgyas pa bcas zhus