[A:67]mkhan phran tshegs byung ba'i dngos po rnams kyi ras dang la tha sogs legs pa rnams phyogs gcig tu mdzad de/ rig 'dzin chen po kun bzang padma phrin las mjal skabs 'bul rgyu yin zhes shin tu gces spras kyis sba bar mdzad/ de phyin gyis phyag rdzas tshang ma rmor chen chos kyi rgyal po de nyid kyi phyag tu ci 'byor mdzad/ lan gcig rmor chen rdo rje 'chang chen po rmor dgon du chibs bsgyur gnang skabs zhig zhabs drung sku na phra mo des/ kho bo rdo rje brag tu 'khrid grogs mdzod ces spyan chab kyis brnangs pa ltar bshum pas/ rmor chen rdo rje 'chang nas/ da lam zhabs drung gi na bza' yang ngan pa dang / nged tsho'i rta drel gyis kyang lcogs pa med pas/ slad mar na bza' legs par bzos te gdan 'dren zhu zhes gnang bas dbugs phyung / rmor chen chos kyi rgyal po rdo rje brag tu pheb skabs rig 'dzin chen pos bkra shis chos sde'i zhabs drung chung ngu de sku khams bde bar bzhugs sam/ zhes sogs thugs brtse'i sgo nas bka' 'dri mdzad tshe/ gong gi gnas tshul rnams zhu bar mdzad pas/ rig 'dzin chen po yang spyan chab yun ring mdzad de/ zhabs drung de khyed kyis gdan 'dren zhus nas mi pheb pa zhes thugs mi mnyes pa'i rnam pa mdzad pa sogs ni/ mngon pa kun btus las/ dran pa gang zhe na 'dris pa'i dngos po la sems kyis ma brjed pa'o/ /zhes pa ltar bla slob gnyis kar yang sngon gyi gnas rjes su dran pa zhes pa'i zag med kyi mngon shes de mnga' ba'i dge mtshan yang dag pa'o snyam/ de skabs zhabs drung yab nas bzhes spro glang po che la nor bu bkal ba'i dbyibs can lo gsar