[A:6]'phel bar 'gyur bas na/ rang nyid dam pa'i rjes su 'jug pa'i spobs pa dge ba khyad par can thob pa'i ched dang / rje bla ma gang gi gzhal du med pa'i bka' drin gyi phung po mngon par dran pas dbang byas/ dad pa dang blo gros can gzhan dag kyang rmad du byung ba'i mdzad phrin gyi rjes su nges par 'jug grang snyam pa'i lhag bsam zla ba tshes pa lta bus nye bar bskul te/ thos pa don dang ldan pa'i ngo mtshar can gyi gtam mtha' yas pa dag rang blos ji ltar nus pa tsam zhig brjod pa 'dir yang rdo rje slob dpon sogs dam pa rnams kyi yon tan bsngags dgos pa'i rgyu mtshan dang / rgyu mtshan can gyi dam pa'i rtogs brjod dngos la 'jug pa gnyis kyi sgo nas bsnyad par bya ba las/ dang po ni/ mdo las/ 'di ltar 'jig rten na rigs thams cad kyi bla mar gyur pa shAkya rnams kyi skyes pa'i rabs bzung zhing chub par byas nas gzhan la'ang rgya cher bsnyad na chos dang mthun pa'i bsod nams kyi phung po dpag tu med pa 'byung la/ yon tan bsam gyis mi khyab pa 'phel bar byed pa yin no/ /zhes gsungs pa lta bu dang / rgyud las kyang / slob dpon yon tan gleng bya yi/ /skyon rnams nam yang ma yin no/ /zhes pa dang / skyon brjod pas ni dngos grub med/ /chu la 'o ma rang zhugs pa/ /de bton nas ni ngang pas 'thung / /de ltar bla ma'i yon tan gzung / /til dang gseg ma 'dres pa las/ /gseg ma dag la bro med dang / /til gdus nas ni khu byung za/ /de ltar bla ma'i yon tan gzung / /ji ltar til mkhan mkhas pa yis/ /til