[A:609] rje rdo rje 'chang nyid kyis sa skya nas 'bul gnang gis phar gsan tshur gsan shin tu gsal bar 'khrungs kyang tshig don ji bzhin ma nges/ zhes gsungs pa 'di dag ni/ nye ring kun la snyoms pa tshangs pa'i dbyangs/ /zhes gsung gi gsang bar mnga' brnyes pa'i brda'o/ /sngon sngags 'chang nyid la sa lotstsha ba 'od gsal du byon nas lung bstan phul du byung ba stsal ba bzhin/ rje nyid la'ang sngags 'chang chos kyi rgyal po zhal gzigs kyi bka' gsang rmad du byung ba grol ba ni gor ma chag kyang / de dus su ma zad/ dus gnas dang bstun par mdzad de gnad che ba 'ga' zhig gi tshe rnam pa kun tu ma nges pa'i zol mdzad cing / gzhan du mnyel ba mi mnga' ba'i ngang tshul bzang po rje nyid la mnga' ba ni ma bcos lhun grub bo/ /tshes brgyad nas phun gling dbang khang du sras yum rnams la/ kye rdo rje'i rgyu dbang rdul dkyil steng nas dang / aShta'i bzlas lung bcas rgyas par stsal ba de ni gong sa gcung rin po cher gong gsal gyi lhums zhugs thog go chod par zhal gyis bzhes pa'i dbang de dang / sku bltams nas 'di nyid smin byed kyi thog ma rang yin par nges la/ de dang mu sbrel zhu dpon ngag dbang dge legs dang / mkhas dbang zhe drung slob grwa dge rgan bcas la'ang stsal zhing / rigs cha/ rtsa rgyud/ sdom gsum rnam gnyis bcas kyi tshogs dbu dang / chos lhun mkhan gsar la mnga' gsol sbyong khrus/ 'jam mgon sku mched/ rje btsun drung zung / rgyal yum bcas la kun rig dbang rdul dkyil steng nas dang / bsnyen thabs kyi ljags lung bcas stsal/ bkra shis zla ba de'i nang lha chen khyams stod gser khri rin po che gsar bskrun mdzad rgyu'i bka' 'doms bzhin/ mdzod 'dzin nas lha bzo zla 'od sogs la bkas mngags te ha lam gyi tsag par zla ba de'i tshes dge bar spyan bdar dus/