[A:659]stabs rje nyid ma phebs/ tshes dgu'i nyin sdo ra dpon slob rnams la gang ci'i zhib gsung grol ba dang chabs gcig sras mo stsal ba'i legs gso'i bdog pa gya nom pa'ang bstar bar mdzad de/ tshes bcu gcig nyin rje rdo rje 'chang yab sras rnam gsum/ rje btsun drung 'chi med bstan pa'i nyi ma/ bdag mo 'chi med dpal 'byor bzang mo sogs zhal ngo rnams dang / sku zhang chos lung pa dang 'gro mgon pa rnam gnyis mdzod 'dzin gyi dbus dpon g.yog skabs su bab pa rnams dang bcas dbus phyogs su chibs bskyod kyi sgo dod pa'i lo rgyus rgyas pa ni gzhan du shes par bya zhing / 'dir rags tsam smos na/ bla brang zam sne nas ki sgra dar g.yab dang / lha chen lcags ri'i steng nas ki sgra zhwa g.yab skyel chang ba rnams nas ki sgra rnams la chibs kha bsgyur tsam mdzad/ srom rdzing khar ja zhus/ gra ma lung du gsol tsha/ ga ra bkra shis dar rgyas kyi drag yur bzhugs/ sang nyin tho rengs zhong pa la rtser lha bsang rgyas pa'i skabs kha ba cung zad 'tshubs shing / dpon slob kun grang ngar 'dar zhum can dang / lhag par rje nyid snyun tshul de ltar lags na'ang bdag gzhan brje ba'i byang sems kho nas dus 'da' bar mdzad pa ni rje de'i khyad par gyi chos so/ /de nas dgon rgyas dang tsha rong du byon 'phral dkar spro'i dga' ston la longs spyad nas/ byang ri'i lha khang gnas gzigs thog skye dgu mtha' yas pa zhig gi gtsug tu phyag gser gyi 'khor lo ngal bso mdzad pa nas bzung yul gru mtha' las su skye bo mtha' yas par byin gyis rlob pa'i tshe rje nyid kyi bsod nams kyi mthus sems can thams cad sdig spong dge la gnas pa byang chub sems dpa'i thugs smon dang bcas spyan phyed btsum gyis spyan chab 'khrugs bzhin du 'khor ba par nges 'byung gting nas 'khrungs pa'i mdzad pa ni/ kun dang thun mong du bdag gis kyang rtogs pa de ltar lags/ der ma