[A:118]bkur sogs yang dag par bgyis te/ me pho byi ba'i lor dbon rin po che rnal 'byor 'jam dpal bzang po'ang gdan drangs te/ dbu thon gang legs kyis lhun grub steng gi rgyal khab tu 'byor/ de nas bzung ste dbyar bkra shis chos rdzong du rkyen sel sgrub pa dang / dgun drug 'du'i dbu bzhugs sogs dbon rin po che nas mdzad/ rje 'dis me mo glang gi lor chos rgyal chen po tshe dbang rdo rje rig 'dzin pa dbus gtsang ljongs kyi rten gsum rnams mjal ba dang / de dag la mchod 'bul dang bsnyen bkur stob pa'i ched du byon song bar/ de skor gyi thugs brel rnams bcad de/ lo de'i hor zla drug pa'i nang sga stod du chibs kha bsgyur/ de phyogs kyi 'gro ba thams cad yang dag pa'i lam la bkod de/ sa rta hor zla dang po'i nang sde dge lhun grub steng du phebs/ der yang don gnyer rnams la zab chos stsol ba dang / lha sras rin po che'i sku'i rkyen sel sogs sgrub par mdzad nas/ de lo hor zla lnga pa'i nang lhun grub steng nas chibs bteg /thog mar smad shod gting lhung chu tshan du byon/ der zhag kha shas bzhugs pa'i skabs shig chu tshan gyi steng der grwa tshang rnams kyis g.yab zhig phub par phyogs gcig na phur pa gdab sa ma mchis pas/ rje 'dis phur pa nged kyis btab chog gsungs nas/ sra mkhregs kyi brag la shing gi phur pa thogs med du btab pa thams cad kyi mig gis mthong du yod pa mngon sum tshad mas grub cing / phyis thams cad kyis dad pa'i rten du khyer ba sogs la brten nas/ grub pa'i go 'phang mthon por gshegs pa'i snyan grags kyis phyogs thams cad du khyab/ de nas rim gyis khrom thar/ sde gzhung / g.yon ru rnams su byon/ dge bsnyen dang / dge tshul gyi sdom pa rab tu mang