[A:8]shin tu mnyes par bya ba'i thabs la 'bad dgos pa yin te/ rin po che'i phung po'i mdo las/ 'od srungs 'di lta ste/ dper na rgya mtsho'i nang du gru zhig na/ gang dag shing leb bam gzhan ci yang rung ba zhig la brten pa de dag ni bde bar 'gram du phyin par 'gyur ro/ /'od srungs de bzhin du byang chub sems dpa'i theg pa thams cad mkhyen pa'i gru zhig ste/ byang chub kyi sems las rab tu nyams na/ gang dge ba'i bshes gnyen gyi shing leb la brten pa de dag ni/ yang thams cad mkhyen pa'i sems rab tu thob ste chos thams cad kyi pha rol tu song nas chos kyi dbyings kyi gling du phyin to/ /zhes dang / sdong po bkod pa'i mdo las/ byang chub sems dpa' rnams kyi byang chub sems dpa'i spyod pa thams cad thob pa ni dge ba'i bshes gnyen la rag las pa'o/ /byang chub sems dpa'i yon tan yongs su rdzogs par bya ba thams cad ni dge ba'i bshes gnyen las byung ba'o/ /byang chub sems dpa'i dge ba'i rtsa ba thams cad ni dge ba'i bshes gnyen gyis bskyed pa'o/ /zhes bya ba la sogs pa dang / sdud pa tshigs su bcad pa las kyang / slob ma bzang po bla mar gus ldan de dag gis/ /bla ma mkhas pa rnams la rtag tu bsten par bya/ /ci phyir zhe na mkhas pa'i yon tan de las 'byung / /de dag shes rab pha rol phyin pa rjes su ston/ /sangs rgyas chos rnams dge ba'i bshes la bsten to zhes/ /yon tan kun gyi mchog mnga' rgyal bas de skad gsungs/ /zhes dang / de lta bas na byang chub dam pa tshol ba yi/ /bsam pa drag ldan mkhas pas nga rgyal nges bcom ste/ /nad pa'i tshogs kyis gso phyir sman pa bsten pa ltar/ /g.yel ba med par dge ba'i bshes gnyen bsten par bya/ /zhes sogs