[A:30]brgyad cu pa zhes bya ba la sogs pa'i man ngag du ma rnams kyang gsan cing khong du chud par byas pa yin no/ /bal po'i paNDi ta padma shrI zhes bya ba las mtshan yang dag par brjod pa dus kyi 'khor lo'i lugs su bkral ba dang man ngag du ma nos so/ /rgya gar gyi rnal 'byor pa bho ta rA hu la zhes bya ba las man ngag gi sgo du ma yang nos so/ /bal po'i paNDi ta dznyA na badzra zhes bya ba las rdo rje rnal 'byor ma'i chos du ma yang thugs su chud par mdzad pa yin no/ /bla ma gong ma de dag las rdo rje theg pa nos pa gang yin pa de dag gi rjes su bzlas pa'i lung dang / sems bskyed dang / rig pa gtad pa'i cho ga dang / rgyud sde bzhi'i dbang bskur ba dang / byin gyis brlab pa dang bcas pa/ bsgrub pa'i lung dang / rjes su gnang ba'i lung dang / bshad pa'i lung dang bcas pa rnams brgyud pa so so'i cho ga ma 'dres shing gang gi yang yan lag ma tshang ba med pa'i cho ga thams cad nos shing thugs su chud par byas nas skal ba dang 'tsham pa'i 'gro ba rnams rjes su 'dzin par mdzad pa yin no/ /gsang sngags rdo rje theg pa'i sgo nas ting nge 'dzin dang / rdzu 'phrul la sogs pa'i yon tan gyi tshogs bsam gyis mi khyab pa mnga' yang 'dir re zhig brjod par mi bya'o/ /de lta na yang mang du brjod pas ci zhig bya ste/ 'dis ni 'phags pa 'jam dpal gyi zhal mngon sum du mdzad de/ rgyud dang mdo sde man ngag du ma gsan cing thugs su chud nas sems can rnams la ji ltar rigs par ston pa yin no zhes yid ches pa'i mi zhabs drung du yun ring du bsdad pa rnams kyis tam yang dang yang du thos shing / yun ring du zhabs drung du bsdad nas nges pa'i shes pa lan mang du skyes pa dang / rgyu mtshan gzhan ji ltar gsungs pa'i chos thams cad la gzhung dang / yi ge mi 'dzin par thugs la 'byung zhing bsnyel ba mi mnga' ba'i phyir shin tu yid ches pa'i gnas su rig par bya'o/ /rje btsun