[A:29]rtsa ba'i rgyud dang / rdo rje gdan bzhi rtsa ba'i rgyud dang / ma hA mA ya rtsa ba'i rgyud dang / mtshan yang dag par brjod pa la shin tu zab pa'i bshad srol dang bcas pa rnams gsan cing khong du chud par mdzad pa yin no/ /yang mdo khams kyi sa'i cha 'bri klung du sku 'khrungs pa'i bla ma kyu ra a skyabs zhes bgyi ba de/ dpal sa skya nyid du spyan drangs nas sngar dge ba'i bshes gnyen kha'u ba las gsan pa'i 'phags pa yab sras kyi dgongs pa lho rdo rje snying po zhes bya ba'i lugs rnams kyang rdzogs par gsan/ slob dpon sangs rgyas ye shes zhabs kyi brgyud pa sman pa'i zhabs zhes bya ba'i skor la/ 'phags pa 'jam dpal nyid kyis gsungs pa'i zhal gyi lung zhes bya ba dang / slob dpon sangs rgyas ye shes zhabs kyis mdzad pa'i lung dang mthun pa'i chos bcu bdun dang / rgyud kyi 'grel pa rin po che'i ljon shing zhes bya ba dang / yang 'jam dpal gyi zhal gyi lung dang / sangs rgyas ye shes zhabs kyis mdzad pa'i chos bcu bdun po dang / mar me mdzad bzang pos mdzad pa'i dkyil 'khor gyi cho ga de rnams la slob dpon sman zhabs kyis mdzad pa'i 'grel pa re re dang / slob dpon de nyid kyi dgongs pa ma lus pa tshang ba dngos grub 'byung ba'i gter zhes bya ba gzhung dang bcas pa ma lus pa thugs su chud par mdzad do/ /yang bla ma de nyid las dge bshes 'gos khug pa nas brgyud pa'i dgyes pa rdo rje'i 'grel pa padma can zhes bya ba dang / nag po dran pa ma zhes bya ba dang / bha wa ma zhes bya ba dang / slob dpon shAnti pa'i mu tig gi phreng ba zhes pa rnams kyang gsan/ dpal rdo rje gdan bzhi pa bha wa pa'i 'grel pa yan lag dang bcas pa rnams dang / ma hA mA ya'i 'grel pa lugs gnyis yan lag dang bcas pa rnams dang / dpal rdo rje bdud rtsi 'byung ba zhes bya ba'i rgyud dang 'grel pa yan lag dang bcas pa rnams kyang gsan/ sems 'dzin