[A:20]mi mi bdun zhes bya ba las gzhon gsum gyi nang nas mkhas par byed pa 'khon klu'i dbang po zhes bya ba yin no/ /de'i gcung po phal pa cig la sras yon tan gyis phyug pa rdo rje rin chen zhes bya ba zhig byung ngo / /de'i sras shes rab yon tan zhes bya/ de'i sras yon tan 'byung gnas zhes bya/ de'i sras tshul khrims rgyal po zhes bya/ de'i sras rdo rje gtsug tor zhes bya/ de'i sras dge skyabs zhes bya/ de'i sras dge mthong zhes bya/ de'i sras bal po zhes bya/ de'i sras shAkya blo gros zhes bya ste de dag thams cad kyang pha rol tu phyin pa'i gzhung lugs dang / rdo rje theg pa'i gsang ba sde drug dang / le lag bdun phra mo nyi shu rtsa gcig gtso bor bzung nas spyod pa de dag gi gdams pa rtsigs kyi chos drug ces bya ba'i man ngag dang ldan zhing yang dag grub pa dang / rdo rje phur pa'i yi dam gyi sgo nas dngos grub kyi rim pa thob pa dag kyang yin no/ /shAkya blo gros de la sras gnyis te/ gcen po shes rab tshul khrims zhes bya ba ni yab mes kyi chos de dag gis rgyud sbyangs shing rdo rje phur pa'i sgo nas dngos grub brnyes te/ mthu dang rdzu 'phrul bsam gyis mi khyab pa dang ldan pa tshangs par spyod pa'i brtul zhugs 'dzin pas mdzes par byas pa yin no/ /de'i gcung dge ba'i bshes gnyen dkon mchog rgyal po zhes bya ba ni/ yab mes kyi chos la man ngag dang sgrub pa phra mo tsam gyis tshim par byas nas gsang sngags phyi 'gyur la thugs spro bar gyur te gcen pos kyang bskul nas/ rtsod pa'i dus kyi rdo rje 'chang chen po 'brog mi shAkya ye shes zhes bya ba'i spyan sngar byon nas dad cing gus pas lo du mar dgyes pa'i rdo rje'i rgyud gsum bstan bcos du ma dang bcas pa man ngag du mas mdzes par byas pa gsan nas/ slar yang sgra bsgyur gyi lo tsA ba 'gos khug pa lha btsas zhes pa la dpal gsang ba 'dus pa 'phags pa yab sras kyi dgongs pa bka' dang