[A:21]bstan bcos man ngag dang bcas pa dag kyang gsan/ yang urYan gyi paNDi ta rnal 'byor gyi dbang phyug dpa' shes rab gsang ba zhes bya ba la dgyes pa'i rdo rje thig le'i rgyud lnga bstan bcos du ma dang bcas pa man ngag gis brgyan pa dag kyang gsan/ yang dge bshes rma lo tsA ba la dpal bde mchog rtsa ba'i rgyud kun tu spyod pa dang bcas pa yab yum gyi sgrub pa'i thabs du ma man ngag du ma dang bcas pa dang / grub pa dang snying po'i gzhung dang man ngag rnams kyang gsan no/ /de dag la sogs pa'i chos kyi sgo du mas phyug par gyur pa'i sras yin pas dge ba'i bshes gnyen gyi rigs su gyur pa yin no/ /yang byang chub sems dpa' sbyin pa'i dpal 'di'i gzugs ni 'gro ba thams cad kyi yid du 'ong zhing shin tu mdzes te skyon gang yang med pas dus mnyam pa'i 'gro ba thams cad kyis 'gran par bya ba'i 'os ma yin zhes kun la grags pa yin no/ /da ni 'di'i yon tan gyi cha cung zad brjod par bya ste/ thog ma med pa nas zhi ba dang / dul ba dang / shes rab dang / yid gzhungs pa dang / snying rje chen po dang / 'dzum pa'i bzhin dang / gsal bar brda phrad par smra zhing nga lo bde la brtson 'grus dang / brtul phod pa dang spobs pa phun sum tshogs pa dang ldan zhing / bla ma dang rgan pa rnams la gus la/ gzhon pa dang sdug bsngal ba rnams la rab tu byams pa'i rang bzhin can yin no/ /de'ang thun mong gi klog dang yig rtsis la sogs pa la rab tu byang zhing 'jig rten dang mthun pa'i bstan bcos rgyal po dang blon po'i lugs la sogs pa rnams la mkhas shing / skyes pa brtag pa dang / bud med brtag pa dang / dud 'gro brtag pa dang / nor bu brtag pa la sogs pa du ma'i sgo nas 'jig rten pa rnams yid bde bar byed pa'i ngang tshul can yin no/ /yang theg pa chen po 'dzin pa'i rtsa ba dang yan lag