[A:༡༨༥]པར་བྱེད་པའི་ཁྲིད་དངོས་ནི། རྡོ་རྗེ་འཆང་ཚར་པ་ཆོས་རྗེའི་གསུང་སྒྲོས་འཇམ་དབྱངས་མཁྱེན་བརྩེའི་དབང་ཕྱུག་གིས་ཟིན་བྲིས་སུ་མཛད་པའི་ཁྲིད་ཡིག་གསང་ཆེན་བསྟན་པ་རྒྱས་བྱེད་ཁའུ་བྲག་རྫོང་པའི་བཞེད་པ་མ་ནོར་བ་ལ་གཞི་མཛད། བུམ་དབང་རྨི་ལམ་མན་ཆད་ཀྱི་ཁྲིད་འཕྲོ་ལུས་པ་རྒྱལ་དབང་ལྔ་པ་རིན་པོ་ཆེས་མཛད་པའི་ཡིག་ཆ་དང༌། གཞན་ཡང་གསུང་བཤད་ཀྱི་རྒྱབ་སྐྱོར་དུ་དགོས་པའི་ཡིག་ཆ་རྣམས་ཀྱི་སྟེང་ནས་ལམ་གྱི་སྔོན་འགྲོ་སྣང་བ་གསུམ་གྱི་ཁྲིད་ཤིན་ཏུ་ཞིབ་པས་རྒྱུད་སྦྱངས་ཤིང༌། དེ་དག་གི་སྐབས་སུ་ཐོག་མར་མན་ངག་གི་བྱུང་ཚུལ་དང༌། བྱུང་བའི་ཆོས་ལ་བཤད་སྒྲུབ་ཇི་ལྟར་བྱ་ཚུལ་གྱི་རྣམ་གཞག་ཞིབ་པར་གསུང་བར་མཛད་ཅིང༌། དེ་ནས་བརྒྱུད་པའི་ཁྱད་པར་གཉིས་ལྡན་གྱི་སེམས་བསྐྱེད་པ་དང༌། དངོས་གཞི་རྡོ་རྗེ་ཐེག་པའི་ལམ་གྱི་རྩ་བ་སྨིན་གྲོལ་གཉིས་ཀྱི་དང་པོ། སྨིན་བྱེད་དབང་གི་མངོན་པར་རྟོགས་པ་བརྒྱད་དང་ལྡན་པའི་སྒོ་ནས་དཔལ་ཀྱེ་རྡོ་རྗེ་མན་ངག་ལུགས་ཀྱི་དབང་བསྐུར་བ་ཨཥྟའི་བཟླས་ལུང་དང་བཅས་པ་དང༌། དེ་དག་གི་སྐབས་སུ་ཁས་བླངས་པའི་དམ་ཚིག་དང་སྡོམ་པའི་རྣམ་གཞག་གསལ་བར་སྟོན་པ་རྩ་ལྟུང་འཁྲུལ་སྤོང་རྗེ་བཙུན་གྱིས་མཛད་པ། རྒྱུན་གྱི་བཟའ་བའི་དམ་ཚིག་བདུད་རྩི་རིལ་བུའི་བསྒྲུབ་ཚུལ་བདག་ཆེན་རྡོ་རྗེ་འཆང་གིས་མཛད་པ། ཁྱད་པར་གྱི་བཟའ་བའི་དམ་ཚིག་ཚོགས་འཁོར་འབྲིང་པོ་རྗེ་བཙུན་རིན་པོ་ཆེས་མཛད་པ། འཕགས་པས་མཛད་པའི་ཚོགས་འཁོར་བདུད་རྩི་བུམ་པ། རྗེ་བཙུན་གྱིས་མཛད་པའི་རབ་གནས་དོན་གསལ། ས་པཎ་ཀྱིས་མཛད་པའི་ཨཥྟའི་གཞི་བཤད་ཀྱི་ལུང་རྣམས་དང༌། གྲོལ་བྱེད་ཀྱི་ཁྲིད་ལ། དབང་གི་ཡེ་ཤེས་ལ་ལོག་པར་རྟོག་པ་དགག་ཅིང་འོག་ནས་འབྱུང་བའི་ལམ་ཐམས་ཅད་སྐྱོན་མེད་དུ་བསྒྲུབ་པའི་ཕྱིར་འཁོར་འདས་དབྱེར་མེད་ཀྱི་ལྟ་བའི་ཁྲིད་དང༌། དེ་ནས་བདག་མེད་ལྷ་མོ་བཅོ་ལྔའི་རས་བྲིས་ཀྱི་དཀྱིལ་