[A:266] grub chen dze tA ris bkral ba'i tshe dpag med lha dgu'i sgrub mchod rnams legs par btsugs te/ nyin re bzhin dge slong bcu re la phyag 'gyed bzang ja sbag re byas pa dang / yang dge slong bco lnga re la bzang ja sbag re byas pa spel ma'i tshul gyi nyin bco lnga dang / yang nyin re bzhin grwa pa re la dngul Tam phyed re dang / dngul zho re dang / dngul Tam re byas pa res mos kyi nyin bco lnga ste mdor na zla ba gcig gi bar la bsnyen bkur ba dang chabs cig /gtsug lag khang du gos chen bzang bsgrigs kyi phye phur cha gcig dang / rgya mthongs khor yug tu gos chen bzang bsgrigs kyi phur ma rnams gsar sbyor mdzad pa dang / gzhan yang rgyal rtse dpal 'khor chos sder mang jas bsnyen bkur ba dang / de'i nang gses gur pa grwa tshang par mang ja 'gyed dang bcas pa'i steng 'khar rnga la sogs pa'i gtan gzhag 'ga' zhig kyang stsal ba dang / zhwa lu dang / snar thang dang / srad rgyud pa dang / srad dgon khra sogs nye skor gyi dgon pa phal che bar mang ja gral 'gyed dang bcas pas bsnyen bkur ba sogs mdor na byang chub sems dpa' kun tu bzang po'i rnam par thar pa dang rjes su mthun par mdzad pa yin no/ /hor zla dang po'i mjug tu e wa~M pa'i dus chos lam 'bras grub mtshams zhig nas/ mkhan rin po che khri thog pa rnal 'byor 'jam dpal bzang po mgul cham lta bus cung zad sku khams bsnyen tshul bzhes par brten/ lo der phyogs mtha' dag nas 'dus pa'i don gnyer nyis brgya lhag tsam la rje 'dis mkhan po mdzad de rab tu byung ba dang / bsnyen par rdzogs pa'i sdom pa legs par stsal te thams cad kyang dge slong 'dul ba 'dzin pa sha stag tu bsgrub par mdzad pa yin no/ /de rjes hor zla gsum pa dang / bzhi pa rnams su phan khang zhabs drung rin po che kun dga' bstan pa'i blo gros