[A:269]bkra shis rin chen theg mchog bstan pa'i rgyal mtshan par/ 'phags yul gyi grub chen birWa pa'i thugs bcud thun mong ma yin pa gsung ngag rin po che lam 'bras slob bshad du grags pa'i smin grol cha lag dang bcas pa yongs su rdzogs pa tshar gcig gis gtsor byas pa'i rje rang gis gsan pa'i dbang lung phal che ba stsal ba dang / yab sras gnyis char gyi sku'i rkyen sel dgos rigs rnams dang / yab rje khri chen rin po ches rgyun du nyams su bzhes pa'i thugs dam gyi lha rnams kyi dbang rjes rnams yang yang 'bul dgos pa dang / sgrol ma lha khang gsar bzhengs la rab tu gnas pa sogs ji ltar bzhed pa'i don mtha' dag sgrub par mdzad pa dang / bka' chos stsal ba'i skabs rnams su'ang khri chen rin po che sogs kyi thugs rgyud la snga na med pa'i nyams bsam gyis mi khyab pa 'khrungs pa dang / gzhan yang rgyal yum nyi zla dbang mor gdung sras ma byung bar brten/ rje 'di la gdung sras myur 'byon gyi skyabs 'jug zhus pa ltar/ srung ba lha lnga bcu rtsa gcig gi dbang dang sor 'brang ma'i 'khor lo bcas stsal te/ ji ltar lung bstan pa bzhin du yun ha cang mi ring bar gdung sras kun dga' bsod nams ngo mtshar ba'i ltas dang bcas te 'khrungs pa dang / rgyun du bdag chen yab sras rnams kyis thugs brtag zhus pa rnams kyang ji ltar lung bstan pa de kho na ltar las 'pho 'gyur lan gcig kyang mi 'byung ba sogs dam pa rnams kyi ye shes gzigs