[A:150]bkra shis grags pa'i rgyal mtshan dpal bzang po zhes yongs su grags pa'i mtshan snyan gyi rgyal rngas phyogs kyi khor yug kun tu khyab par gyur pa gang de'i rnam par thar pa skye bo tha mal pa rnams kyi blo ngor snang ba de mdor tsam zhig brjod par bya ste/ de la bdun/ thog mar sems can gyi don du sku'i skye ba bzhes nas gzhon nu rol rtsed mdzad pa'i tshul/ rgyal ba'i bstan pa rin po che'i sgor zhugs nas rgyud sdom pa gsum ldan du mdzad pa'i tshul/ zhugs pa'i rten des thos bsam sgom gsum ji ltar mdzad pa'i tshul/ phrin las kyi gtso bo bstan pa dang sems can gyi don rlabs po che ji ltar mdzad pa'i tshul/ chos kyi 'khor lo bskor ba'i grub 'bras bstan 'dzin gyi slob ma ji tsam byung ba'i tshul/ sdom pa gsum la gces spras su mdzad cing nyams rtogs ji ltar 'khrungs pa'i tshul bye brag tu bshad pa/ mthar gdul bya rtag 'dzin can rnams chos la bskul ba'i ched du gzugs sku'i bkod pa chos kyi dbyings su bsdus pa'i tshul bshad pa'o/ /de la dang po sems can gyi don du sku'i skye ba bzhes nas gzhon nu rol rtsed mdzad pa'i tshul ni/ bdag gi bla ma 'phags pa 'jam pa'i dbyangs mi rnams kyi bla mar gyur pa/ 'jig rten na 'jam dbyangs mkhyen brtse'i dbang po zhes yongs su grags pa de'i zhal snga nas mdzad pa'i mkhan chen rdo rje 'chang chen po 'di'i rnam thar gsol 'debs byin rlabs bdud rtsi'i sprin mdzes zhes bya ba las/ rdo rje 'chang dbang ye shes las byung ba'i/ /byams pa'i thugs rjes 'gro rnams sgrol ba'i slad/ /kun dga'i mtshan dper shar ba'i sgyu 'phrul gyis/ /bstan pa'i rgyal mtshan 'dzin la gsol ba 'debs/ /mgon khyod gdod nas zhi ba mchog brnyes kyang / /rmad byung snying rje'i bdud rtsi'i dpyid dpal gyis/ /dam pas bsngags pa'i rigs kyi dga' tshal du/ /gzugs sku'i ljon bzang 'khrungs la gsol ba